రామాయణము సుందరకాండ -నలుబదిఒకటవసర్గ

                                  రామాయణము 

                               సుందరకాండ -నలుబదిఒకటవసర్గ 

సీతాదేవిని దర్శించుట అనే ముఖ్యకారణము ముగిసినది ,ఇంకనూ చేయవలసిన కార్యమేమి అని హనుమ ఆలోచించసాగెను . సామదానబేధదండోపాయములలో మొదటి మూడిటితో ఇక్కడ పనిలేదు కావున ఆఖరిది ఐన దండోపాయము ప్రయోగించి రావణుని బలము తెలుసుకోవాలని హనుమ భావించెను . చెప్పిన పనిని చక్కగా పూర్తిచేయుటే కాక దానిని సంభందించిన ఇతర పనులను కూడా చేయువాడే సమర్ధుడు . కావున ఇప్పుడు నేను ఈ లంకా నగరములో కల రాక్షసుల  బలములు, యుద్ధ నైపుణ్యములు ,మంత్రులను తెలుసుకుని సుగ్రీవుడి వద్దకు వెళ్ళినచో యుద్ధ ప్రణాళిక వేయుటకు అనువుగా ఉండునని ఆలోచించెను . 

వీరికి యుద్ధమునకు రెచ్చగొట్టుటకు తగిన ఉపాయమేదని  అలోచించి ,తానూ వున్న ఆ  సుందరమైన అశోకవనమును ధ్వంశము చేయుట ద్వారా వారిని రెచ్చకొట్టవచ్చునని ,తద్వారా తనను ఆపుటకు వచ్చిన రాక్షసులందరినీ తుడా ముట్టించి సుగ్రీవుడి వద్దకు వెళ్లవలెనని నిర్ణయించుకొనెను . పిమ్మట అక్కడ బాగుగా పుష్పించి చక్కగా ఉన్న చెట్లను పీకివేయుట ,వాటి కొమ్మలను విరుచుట ,విరిచిన వాటిని మిగిలిన వాటి మీద విసిరికొట్టుట మొదలగు పనులు చేస్తూ రాక్షసులకోసము ఎదురుచూడసాగెను . 

రామాయణము సుందరకాండ నలుబదిఒకటవసర్గ సమాప్తము . 

              శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -నలుబదియవసర్గ

                                   రామాయణము 

                                  సుందరకాండ -నలుబదియవసర్గ 

హనుమంతుడి మాటలు విన్న సీతాదేవి "మారుతీ !ఇక్కడ నేను పడుతున్న నరక యాతనను శ్రీరామునికి వివరించి చెప్పు "అని పలికెను , హనుమ సీతాదేవి చెప్పిన మాటలన్నీ విని ఉత్తర ముఖంగా వెళ్ళుటకు సిద్దపడెను . 

రామాయణము సుందరకాండ నలుబదియవసర్గ సమాప్తము . 

       శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ముప్పది తొమ్మిదవసర్గ

                                          రామాయణము 

                                                    సుందరకాండ -ముప్పది తొమ్మిదవసర్గ 

శిరోభూషణము ఇచ్చిన పిమ్మట సీతాదేవి హనుమతో "ఓ కపివరా !ఈ మణిని చూసిన వెంటనే శ్రీరాముడు నా తల్లిని ,తండ్రిని, నన్ను గుర్తుకుతెచ్చుకొనును . పిమ్మట కార్యాచరణను ఆలోచించును . ఓ హనుమా !శీఘ్రముగా కార్యసిద్ధికి ఆలోచన చేయుము . ఈ కార్య నిర్వహణకు నేవే తగినవాడవు . ఓ మారుతీ !నడుము బిగించి ,నా దుఃఖములను తొలగించుటకు పూనుకొనుము . " పలికెను . ఆ మాటలు విన్న మారుతి "అట్లే చేయుదును "అని ప్రతిజ్ఞ చేసెను . హనుమ బయలుదేరుతుండట గమనించిన సీతాదేవి "ఓ హనుమా !రామలక్ష్మణులిద్దరి కుశలం నేను అడిగానని చెప్పు . శ్రీరాముని మిత్రుడైన సుగ్రీవ మహారాజుని కుశలం  అడిగానని చెప్పు . వానరభల్లూక సైన్యము మొత్తమును వారివారి వయస్సు వారీగా క్షేమము అడిగానని చెప్పు . ఈ రోజు ఇక్కడే విశ్రమించి రేపు ఉదయమే బయలుదేరి వేళ్ళు. మళ్లీ నీవు వచ్చువరకు నేను ప్రాణములతో వుంటానోలేదో ? "అని పలికెను . 

అప్పుడు హనుమ "అమ్మా !నేను వెళ్లిన వెంటనే శీఘ్రముగా శ్రీరామచంద్రమూర్తి తన సైన్యముతో కలిసి ఇచటికి వచ్చి నిన్ను ఈ చార నుండీ విడిపించగలడు . నీవు అధైర్యపడవద్దు . గడువులోపలే శ్రీరాముడు నిన్ను చేరును . "అని పలికెను . అప్పుడు సీతాదేవి "వానరభల్లూక సైన్య విషయములో నాకొక సందేహము కలుగుచున్నది . నీవు సమర్థుడవు కావున సముద్రమును దాటి వచ్చావు . మరి రాజకుమారులు సుగ్రీవమహారాజు ,వానరభల్లూక సైన్యములు ఆ మహా సముద్రమును దాటి ఎలా రాగలవు ?"అని ప్రశ్నించెను . 

దానికి సమాధానముగా హనుమ "అమ్మా !దివ్యమంగళ స్వరూపిణీ !సుగ్రీవమహారాజు వద్ద నాకంటే బలశాలురు అనేకులు కలరు . వారు భూమిపైనా ,ఆకాశములో ,నీటిలోనూ మూడువిధములుగా వెళ్ళగలరు . సాధారణముగా దూతగా సామాన్యులనే పంపును కదా !(సీతాదేవికి దైర్యముకలిగించుటకై  హనుమ ఈ విధముగా మాట్లాడేను ) సుగ్రీవమహారాజు యావత్ సైన్యము అవలీలగా సముద్రమును దాటి రాగలరు . రామలక్ష్మణులిద్దరిని నా భుజములపై ఎక్కించుకుని తీసుకురాగలను . మనసులో ఏ మాత్రము వ్యాకుల పడవద్దు . అతి త్వరలోనే అతి పెద్దదైన వానర భల్లూక సైన్యముల కోలాహలమును నీవు వినగలవు . ఈ రాక్షసులను పరిమార్చి నీ వద్దకు వచ్చిన శ్రీరామ ప్రభువును చూడగలవు "అని ధైర్యవచనములు పలికెను . 

రామాయణము సుందరకాండ ముప్పదితొమ్మిదవసర్గ సమాప్తము . 

            శశి ,

ఎం . ఏ ,ఎం .ఏ (తెలుగు ),తెలుగు పండితులు . 

రామాయణము సుందరకాండ -ముప్పదియెనిమిదవసర్గ

                             రామాయణము 

                            సుందరకాండ -ముప్పదియెనిమిదవసర్గ 

సీతాదేవి పలికిన మాటలు విని హనుమ సంతోషముతో "తల్లీ !నీ మాటలు సహేతుకములు ,పాతివ్రతలానమ్రతకు తగినవి . నీవంటి పతివ్రతా శిరోమణికి ఆ లోకోత్తమ మూర్తియే తగినవాడు . సరే తల్లి నీకు నాతొ రావటం ఇష్టములేకపోతే ,నీ ఆనవాలుగా ఏదైనా ఇవ్వు "అని పలికెను . 

ఆ మాటలు విన్న సీతాదేవి "ఓ వానరశ్రేష్టా !నాకూ శ్రీరామునికి మాత్రమే తెలిసిన ఒక కధ చెబుతాను . దానిని నా గుర్తుగా శ్రీరామునికి చెప్పు "అని కధ ఇలా చెప్పసాగెను "చిత్రకూటపర్వతము ఈశాన్యభాగమున ఒక చిన్న పర్వతము కలదు . అక్కడ ఫలమూలములు ,ఉదకము సముద్దిగా ఉంటాయి . ఆ ప్రదేశములో మందాకినీ నదీ సమీపమున ఒక సిద్దాశ్రమములో కొంతకాలము శ్రీరామునితో కలిసి ఉన్నాను . 

ఒక రోజు నేను అక్కడి వనములలో ,నదీ తీరములలో విహరించి అలసి శ్రీరాముని చెంత కూర్చుని ఉండగా ఒక కాకి (ఇంద్రుని వరము వలన జన్మించినది )వచ్చి మాంసము మీది ఆశతో నన్ను పొడవసాగెను . నేను చేతులతో అదిలించసాగాను . కానీ అది పోకుండా నన్నే పొడవసాగెను . నేను అక్కడ వున్న మట్టి బిడ్డలు దాని మీద వేసి అదిలించే ప్రయత్నమూ చేసాను . కానీ అది ఎంతకూ పోవటం లేదు అలా దానిని బెదిరించు సమయములో  నా వడ్డాణము జారుటచే నేను సరిచేసుకోవడం చూసి ,శ్రీరాముడు నవ్వేను . 

అప్పుడు నాకు సిగ్గుగా అనిపించెను . కొంతసేపటికి శ్రీరాముడు నా వొడిలో నిద్రించెను . అప్పటికీ కాకి బాధ నాకు తప్పలేదు . శ్రీరాముడు నా వొడిలో పడుకుని ఉండుటచే నేను లేచి కాకిని అదిలించలేకపోయాను . దానితో అది ఇంకొంచుం విజృంభించి నన్ను పొడవసాగెను . నేను ఎంత అదిలించినా అదిపోక నన్ను పొడుచుతుండుటచే అది పొడిచినచోట రక్తము కారసాగెను . ఆ రక్తము శ్రీరామునిపై పడి ఆయనకు మెలకువ వచ్చెను . నిద్రలేచిన శ్రీరాముడు రక్తమోడుతూ ఉన్న నన్ను చూసి  మిక్కిలి క్రుద్ధుడై "భయంకరమైన సర్పము పడగ తాకుటకు చూసినట్టు నీ జోలికి వచ్చినవాడెవడు ?వాడిని ముల్లోకములలో రక్షించువాడెవ్వడూ ఉండడు "అని పలికి ఎదురుగా వున్న వాయసము (కాకి )ని చూసి తన దగ్గరలో వున్న దర్భను తీసుకుని బ్రహ్మాస్త్రముగా మంత్రించి కాకి మీదకు ప్రయోగించెను . అది నిప్పులు కక్కుతూ కాకివైపుగా వెళ్లగా ,అది తన ప్రాణ రక్షణ కొఱకు లోకాలన్నీ తిరిగేను 

తనతండ్రి ఐన ఇంద్రుడు కానీ ,సమస్త దేవతలు కానీ కాకికి అభయము ఇవ్వలేకపోవుటచే అది తిరిగి మా దగ్గరకే వచ్చి శ్రీరాముని పాదములపై వాలి ఆయనను శరణు వేడెను . శరణు వేడినంతనే శ్రీరాముడు కరుణించి ఆ కాకిని క్షమించి వదిలివేసెను "ఈ కధ శ్రీరామునికి చెప్పు ఇంకా ఆయనతో "ఓ ప్రాణనాథా !మీరు  వచ్చి నన్ను కాపాడతారనే ఆశతోనే ఇన్నిరోజులూ జీవించివున్నాను . పరాక్రమమును నీకు సాటి ఐన వారు ఈ భూమండలముపై ఎవరూలేరు . నీవు తలుచుకున్నచో ఈ రాక్షసులందరినీ క్షణకాలంలో మట్టుపెట్టగల సమర్థుడవు . మరి ఎందుకు ఇంకా ఉపేక్షిస్తున్నావు . అతి త్వరగా వచ్చి నాకు నీ దర్శన భాగ్యము కలిగించు . నాకు ఇంకా రెండు నెలలు మాత్రమే గడువు వున్నదినీ గడువు లోపల నీవు నా కొరకు రాలేకపోతే ఈ జన్మలో ఇక నేను నిన్ను చూడలేను . నా యందు దయ ఉంచి త్వరగా వచ్చి నన్ను రక్షించు చి చెప్పు "అని కన్నీరు కారుస్తూ హనుమతో పలికెను . 

ఆ మాత  కన్నీరు చూసిన హనుమ మిక్కిలి బాధతో అమ్మా !బాధపడకు ,నేను వెళ్లిన వెంటనే శ్రీరాముడు సుగ్రీవసహితుడై ,వానర భల్లూక సైన్యముతో కలిసి వచ్చును నిన్ను తప్పక రక్షించును . శ్రీరామునికి ,లక్ష్మణునికి నీ మాటగా ఏమి చెప్పమంటావు ?"అని పలుకగా సీతాదేవి "శ్రీరాముని పాదపద్మములకు నా ప్రణామములు తెలుపు లక్ష్మణుని నేను అడిగానని చెప్పు "అని పలికి తన చీర కొంగులో వున్నా చూడామణిని హనుమకు ఇచ్చినది . 

సీతాదేవి ఇచ్చిన చూడామణిని కళ్ళకు అద్దుకుని దానిని చేతికి పెట్టుకొనెను . 

రామాయణము సుందరకాండ ముప్పదియెనిమిదవసర్గ సమాప్తము . 

                          శశి 

ఎం .ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ - ముప్పది ఏడవసర్గ

                                  రామాయణము 

                                   సుందరకాండ - ముప్పది ఏడవసర్గ 

అంజనీసుతుడైన హనుమ మాటలు విన్న సీత "ఓ  వానరోత్తమా !విధివశము ఇదేకదా చక్కగా అంతః పురములో రాజుస్సుఖములు అనుభవించవలసి న వాళ్లమైన రామలక్ష్మణులు నేను అరణ్యములోకి వనవాస నిమిత్తము ప్రవేశించాము అక్కడ బానే వున్నాము అనుకునేలోపల రాక్షసుడి చేత అపహరించబడి ఈ రాక్షస చెరలోకి చేరి యాతన పడుతున్నాను . అధముడైన రావణుడు నాకు ఒక సంవత్సరకాలం గడువు విధించెను . ఇప్పుడు పడవనేల గడుచుచున్నది ఇంకా రేడు నెలలు మాత్రమే మిగిలి ఉన్నది . ఈ గడువు వరకే నేను ప్రాణములతో వుంటాను . కావున త్వరగా నా వద్దకు వచ్చి నన్ను రక్షించమని చెప్పు "అని పలికెను . 

అప్పుడు హనుమ "అమ్మా !శ్రీరాముడు నా మాట వినినంతనే కోట్లాదిగా కల వానరభల్లూక సేనలతో కూడి ఇక్కడకు శీఘ్రముగా రాగలడు . అంతదాకా ఎందుకు ?ఇప్పుడే నేను నిన్ను తీసుకువెళ్లి ,నీ దర్శనము కోసము వేచి చూస్తున్న శ్రీరాముని వద్దకు నిన్ను చేర్చగలను . నేను తలచుకుంటే దుష్టుడైన రావణాసురిడితో సహా ఈ లంకా నాగరిని మొత్తము ఎత్తుకెత్తి నా ప్రభువు శ్రీరాముని కాళ్ల దగ్గర పడవేయగలను . మిమ్ము భుజములపై ఎక్కించుకుని శ్రీరాముని చెంతకు చేర్చుతాను . నేను వేగముగా ఎగురునపుడు నన్ను అందుకొనుట ఎవరితరమూ కాదు . అగ్నిదేవుడు హవ్యమును మోసుకుపోవునట్లు నేను మిమ్ము మోసుకుపోగలను " అని పలికెను . 

ఆ మాటలు విన్న సీతాదేవి "ఓ వానరోత్తమా నేవే చిన్నగా వున్నావు . నీకంటే పెద్దగా వున్న నన్ను ఎలా మోసుకుపోగలవు ?అని అడిగెను . అది తనకు అవమానంగా భావించిన హనుమ వెంటనే తన దేహమును పెంచి తన బృహద్రూపమును సీతామాతకు చూపించెను . అప్పుడు సీతాదేవి "ఓ వానరోత్తమా !నీవు సముద్రమును లంఘించి వచ్చినావని తెలిసినపుడే నీ శక్తి సామర్ధ్యములను అంచనా వేసాను . ఇప్పుడు నీ ఈ రూపము చూసిన పిమ్మట నాకు ఇంకా నమ్మకము కలిగినది . నన్ను బలవంతముగా తీసుకువచ్చిన ఈరాక్షసుడికి తగిన బుడ్డి చెప్పి నా ప్రభువే నన్ను గౌరవంగా తీసుకువెళ్లవలెను . అదే నాకు మర్యాద ఆయన శక్తిసామర్ధ్యములకు మర్యాద . అదీకాక నేను పతివ్రతము నా భర్తను తప్ప మారె పర పురుషుడిని తాకనే తాకను . ఈ రావణుడు నన్ను బలవంతముగా తీసుకుని వచ్చినప్పుడు అతడి శరీర స్పర్శ నాకు తగిలినది కాని అది నేను కావాలని చేసినది కాదు . పైగా అప్పుడు నేను అశక్తురాలను . ఆ దుష్ట రావణునికి బదులు చెప్పి నా స్వామి నన్ను అతి త్వరలోనే తీసుకువెళ్లును ఇది నా పరిపూర్ణవిశ్వాసము . ఆ విశ్వాసము వల్లనే నేను ప్రాణములతో వున్నాను . మృత్యుదేవత రావణునికి అతి సమీపములో వున్నది . ఇది నిజము . "అని పలికెను . 

రామాయణము సుందరకాండ ముప్పదియేడవసర్గ సమాప్తము . 

                 శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము

                               రామాయణము 

                              సుందరకాండ -ముప్పదిఆరవసర్గ 

మహాతేజశ్శాలీ ఐన వాయునందనుడు సీతాదేవికి ఇంకా విశ్వాసము కలిగించుటకు "అమ్మా !నేను వానరుడను శ్రీరాముని దూతను శ్రీరాముడు పంపగా ఇక్కడికి వచ్చాను "అని పలికి శ్రీరాముడు తన గుర్తుగా సీతాదేవికి ఇచ్చుటకు ఇచ్చిన ఉంగరమును సీతాదేవికి సమర్పించెను . 

ఆ ఉంగరమును చూసిన సీతాదేవి నిజముగా తన భర్తను తిరిగి పొందినంత పరమానందం పొందెను . పిమ్మట హనుమపై పరిపూర్ణ విశ్వాసము కలిగినదై "ఓ వానరా !నీకు శుభమగుగాక !నిజముగా నీవు గొప్ప వీరుడవు ,సమర్థుడవు . కనుకే వందయోజనములు దూరము వ్యాపించి వున్న సముద్రమును దాటి రాగలిగావు . ఆణువణువూ రక్కసుల కాపలాలతో నిండి వున్న ఈ లంకా నగరిలో వారందరిని తప్పించుకుని నావద్దకు చేరగలిగావు . శ్రీరాముడు సర్వసమర్దుడు . ఆయన కార్యములకు యోగ్యులను మాత్రమే నియమించును . శ్రీరామచంద్ర ప్రభువు ఎలా వున్నారు . లక్ష్మణుడు కుశలమేనా ?అయోధ్యలోని వారి కుశల సమాచారం తెలియవచ్చుచున్నావా ?శ్రీరాముడు నన్ను తీసుకువెళ్ళుటకు ఎందుకు రావటంలేదు . ఆయన నన్ను మరువలేదు కదా !"అని పలికి సమాధానము కోసము మారుతిని చూసేను . 

అప్పుడు మారుతి "అమ్మా !శ్రీరాముడు సత్యసంధనుడు ,ఏకపత్నీవ్రతుడు ఆయన మిమ్ములను మరచుట జరగని పని . ఆయన అనుక్షణమూ మిమ్ములనే కలవరించును .  శ్రీరామచంద్రప్రభువు కేవలము దేహమును నిలబెట్టుకొనుటకు మాత్రమే ఆహారము తీసుకొనును . అసలు నిద్రే పట్టదు . ఒకవేళ పట్టినా సీతాసితా అని కలవరిస్తూ ఉలిక్కిపడి లేచును . ఆయనకు అనుక్షణమూ మీ ద్యాసే . కొంచం అందముగా ప్రకృతీ కనిపించినా మిమ్ములనే తలుచును ఆయనకు మీరు ఇక్కడున్న సంగతి తెలియదు . అందుకే ఇంకా రాలేదు . నేను వెళ్లి ఆ ప్రభువుకి సమాచారము ఇవ్వగానే ఆయన వచ్చి సముద్రమును అతలాకుతలం చేసి లంకానగరము చేరును . ఇక్కడి రాక్షసులందరిని మట్టి కరిపించి మిమ్ములను ఆయనతో తీసుకువెళ్లును . "అని పలికెను . 

రామలక్ష్మణుల సమాచారం తెలిసినందుకు సీతాదేవి మిక్కిలి సంతోషించెను . వెంటనే శ్రీరాముడు తన వలన వేదనపడుతున్నాడని ఆమె కూడా బాధపడెను . 

రామాయణము సుందరకాండ ముప్పదిఆరవసర్గ సమాప్తము . 

                         శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ముప్పదియైదవసర్గ

                               రామాయణము 

                                సుందరకాండ -ముప్పదియైదవసర్గ 

హనుమంతుడి మాటలు విన్న సీతాదేవి హనుమతో "ఓ వానరా ! నిజముగా శ్రీరాముని దూతవే అయితే ఆయన గుణగణాలను వర్ణించు ,శ్రీరామునికి సుగ్రీవునికి స్నేహము ఎలా కుదిరినదో నాకు వివరముగా చెప్పుము . "అని పలికెను . అప్పుడు మారుతి 

శ్రీరాముని రూప లావణ్యమును ,అందచందములను చక్కగా వివరించెను . ఇంకా శ్రీరామునికి సుగ్రీవునికి మైత్రి కలిగిన విధానమును కూడా వర్ణించెను . ఇంకా "ఓ మాతా !ఒకనాడు నేను ,మా ప్రభువైన సుగ్రీవుడు ఇంకా కొంత మంది వానరప్రముఖులు కలిసి ఋష్యమూక పర్వతముపై కూర్చుని ఉండగా ఒక ఉత్తరీయములో కట్టబడిన నగల మూట మా మధ్యలో పడెను . తలా పైకెత్తి చూడగా ఒక రాక్షసుడు సుందర రూపము కల స్త్రీని అపహరించుకు పోతున్నాడు . ఆ నగల మూటను మా ప్రభువైన సుగ్రీవుడు జాగ్రత్తపరిచేను . తదుపరి కొంతకాలమునకు శ్రీరామచంద్రప్రభువు మిమ్ములను వెతుకుతూ వచ్చినపుడు మేము ఆ నగల మూటను ఆయనకు చూపినాము . అప్పుడు ఆ ప్రభువు ఆ నగలను చూసి వాటిని గుర్తించి వెంటనే స్పృహ తప్పి పడిపోయెను . అప్పుడు నేనే ఆయనను అతి కష్టము మీద లేవదీసి కూర్చుండపెట్టితిని . ఆయనను ఊరడించుట చాలా కష్టమైనది "అని తదితర విషయములన్నిటిని వివరముగా చెప్పెను . 

పిదప "ఓ మైథిలీ !విషయములన్నీ సవివరముగా నీకు వివరించాను . నీవు ఊరడిల్లినట్లయితే నేను వెళ్తాను . "అని పలికెను . 

రామాయణము సుందరకాండ ముప్పదియైదవసర్గ సమాప్తము . 

                  శశి ,

ఎం . ఏ ,ఎం . ఏ (తెలుగు ),తెలుగు పండితులు .