రామాయణము సుందరకాండ -ఇరువది ఏడవసర్గ

                                  రామాయణము 

                                  సుందరకాండ -ఇరువది ఏడవసర్గ 

సీతాదేవి ఆ విధముగా బాధపడుతుండగా రాక్షస స్త్రీలందరూ కోపముతో వుడికిపోయిరి . కొందరు రాక్షస స్త్రీలు రావణునికి ఈ విషయము నివేదించుటకు వెళ్లిరి . మిగిలిన రాక్షస స్త్రీలు సీతాదేవికి అతి చేరువగా వచ్చి శూలములు చూపుతూ ,బయపెట్టసాగిరి . ఇంతలో త్రిజట అనే రాక్షసి అప్పుడే నిద్ర నుండి మేల్కొని ఆ రాక్షస స్త్రీలను అదిలించి "ఓ దుష్టస్త్రీలారా !మిమ్మలను మీరే తినేయండి . ముందు నా మాట వినండి . నాకొక భయంకరమైన కల వచ్చింది . "అని పలుకగా అక్కడి స్త్రీలందరూ సీతాదేవిని బెదిరించటం ఆపి త్రిజట చుట్టూ చేరి ,"ఏమిటా కల ?"అని అడిగిరి . 

ఏనుగుదంతములతో నిర్మింపబడి వేయి హంసలతో లాగబడుతున్న దివ్యమైన పల్లకీలో రాముడు లక్ష్మణుడు ఇటువైపుగా వచ్చుచున్నారు . ఈ సీత శుభ్రమైన వస్త్రములు ధరించి సముద్రమధ్యలో తెల్లని పర్వతముపై వున్నట్టుగా చూసాను . ఏనుగు ఎక్కి శ్రీరాముడు సీతాదేవి వద్దకు వచ్చి ఆమెను కూడా ఆ ఏనుగుపై ఎక్కించుకున్నట్టు చూసాను . అప్పుడా ఏనుగు లంక మధ్యలో నిలిచినట్టు చూసాను . పిదప రాముడుసీతా లక్ష్మణులు మువ్వురూ పుష్పకవిమానము ఎక్కి ఉత్తరదిశగా వెళ్లినట్టు చూసాను . 

గన్నేరు దండ మేడలో ధరించిన రావణుడు శరీరముపై నూనె పూసుకుని కింద పడివున్నట్టుగా చూసాను . ఒక నల్లని స్త్రీ ఒంటి నిండా బురద పూసుకుని ,రావణుని మెడకు తాడు కట్టి దక్షిణ దిక్కుకు లాక్కుని వెళ్తున్నట్టుగా చూసాను . రావణుని సుతులు కుంభకర్ణుడు కూడా వంటి నిండా నూని పూసుకుని ,దక్షిణ దిక్కుకు వెళ్తున్నట్టుగా చూసాను . వారందిరిలో ఒక్క విభీషణుడు మాత్రము దివ్య గజము ఎక్కి తెల్లటి వస్త్రములు పూలమాలలు వేసుకుని ,సంగీత నృత్యములు ఆనందించుచున్నట్టు కనిపించెను . లంకాపురి మొత్తము చిన్నాభిన్నమై పోయి ,సముద్రములో పడిపోయినట్టు చూసాను . వీటిని బట్టీ చూస్తుంటే ,త్వరలోనే శ్రీరాముడు వచ్చి మనవారందరిని చంపి సీతాదేవిని తీసుకువెళ్తాడు . 

ఇన్నాళ్లు ఈమెను నానాబాధలు పెట్టాము . ఇక ఈమెను శరణు వేడటమే చేయవలిసినది . శ్రీరాముడు మనల్ని కూడా చంపివేయును . ఈమె మాత్రమే మనల్ని రక్షించుటకు సమర్థురాలు . "అని పలికెను . ఆ మాటలు విన్న సీతాదేవి కొంత ఊరడిల్లేను . కానీ మనసులో బాధ మాత్రము అలానే వున్నది . 

రామాయణము సుందరకాండ ఇరువదియేడవసర్గ సమాప్తము . 

               శశి ,

ఎం .ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువది ఆరవసర్గ

                                      రామాయణము 

                                         సుందరకాండ -ఇరువది ఆరవసర్గ 

సీతాదేవి కన్నీరుమున్నీరుగా ఏడుస్తూ ,తనలోతాను "నాకు ప్రాణమైన భర్తకు దూరమైనా నాకు ఈ అలంకారములు ఎందుకు ?సంపదలు ఎందుకు ?ఏదేమైనను నా ఎడమకాలి గోటితో కూడా అధముడైన ఆ రాక్షసుడిని తాకను . నా భర్త నాకు దూరమైనా కూడా నేను ఎలా బతకగలుగుతున్నాను ?ఈ గుండె బహుశా ఇనుపముద్దతో చేయబడినట్లున్నది . కనుకే ఇంకా జీవించువున్నది . అయ్యో నేను ఎంతటి దౌర్భాగ్యురాలినో కదా . 

నా భర్త అరివీరపరాక్రమముడు అతడిని ఎదిరించి ఎవరూ నిలవలేరు . రామలక్ష్మణులు ఇద్దరూ కలిసి ఈ భూమండలమును తమ బాణములతో అతలాకుతలం చేయగలరు . మరి వారు నాకోసము ఈ భూమండలం మీద వెతుకుటకు  ప్రయత్నమూ చేయుటలేదా ? ఒకవేల చేసినను నేను ఇక్కడ వున్నానని వారికి ఎలా తెలుస్తుంది . ఆ దుష్టుడు నన్ను ఎత్తుకొస్తుండగా జటాయువు ఒక్కడే చూసాడు . కానీ అతడు కూడా ఈ దుర్మార్గుడి చేతిలో మరణించాడు . 

ఈ స్థితిలో వారికి నా గురించి ఎలా తెలియును ?ఏదేమయినప్పటికీ వారిరువురు అతిత్వరలోనే నన్ను వెతుకుతూ ఇక్కడికి వస్తారు . అప్పుడు ఈ లంక అణువణువూ గాలించి రాక్షసులందరినీ ,ఒక్కరిని కూడా వదలకుండా అందరిని తుద ముట్టిస్తారు . అప్పుడు ఈ లంకలో కేవలము స్త్రీలు మాత్రమే మిగులుతారు . ఇది తధ్యము . దండకారణ్యములో ఒక్కడే పదునాలుగువేలమంది రాక్షసులను చంపినా ధీరుడు నా భర్త . విరాధుడిని చంపిన వీరుడు నా భర్త . అంతటి గొప్పవాడికి ఈ సముద్రము ఒక లెక్కా ?ఆయన తప్పక నన్ను వెతుకుతూ వచ్చెదరు . కానీ ఆయన వచ్చేవరకు నేను ప్రాణాలతో ఉండగలనా ?ఆ దివ్యమంగళ రూపమును చూడగల అదృష్టము నాకు ఉన్నదా ?"అని పరిపరి విధములుగా బాధపడుతూ ఆలోచించసాగెను . 

రామాయణము సుందరకాండ ఇరువదిఆరవసర్గ సమాప్తము . 

                శశి , 

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువది అయిదవసర్గ

                                       రామాయణము 

                                    సుందరకాండ -ఇరువది అయిదవసర్గ 

ఆ అశోకవనంలో సీతాదేవికి కాపలావున్న రాక్షసస్త్రీలు సీతాదేవిని పలువిధములుగా తమ మాటలచేత ,చేష్టలచేత భయపెడుతుండగా ఆ మాత శోకమూర్తిలా ఏడ్చుచూ ,భయముతో వణికిపోసాగెను . అయినను ఆ రాక్షస స్త్రీలతో "మీరు కోరుకున్నట్టుగానే నన్ను తినేయండి . నేను మాత్రము మీరు చేపినది చేయను ". అని పలికెను . 

ఆ విధముగా పలికి తన స్థితి తలచుకుని దుఃఖించెను . "అయ్యో ఎప్పుడు ఏ పాపము చేసానో నాకీవిధమైన దుస్థితి లభించినది . హా రామా !హా లక్ష్మణా !,అయ్యో కౌసల్యా మాతా !అయ్యో సుమిత్రా మాతా !"అని రోదించెను . "రాముడికి దూరమైనను నేను బతికి ఎలా వున్నాను . ఈ రాక్షస స్త్రీల కాపలా నుండి తప్పించుకుని నా రాముడిని నేను చేరలేను . బహుశా ఈ జన్మలో శ్రీరాముని దర్శనభాగ్యము నాకు కలుగునో లేదో ?ఇక ఈ జన్మ జీవించి ఏమి ప్రయోజనము ?జీవించుట కంటే మరణించుటే ఉత్తమము . కానీ పెద్దలు ఆత్మహత్య మహాపాపము అని చెబుతారు . అదీకాక నేను రాముని అర్ధాంగిని ఆయన అనుమతి లేకుండా మరణించుట సరికాదు . కావున చావు వచ్చు వరకు జీవించవలసినదే . జీవించినతవరకు రాముని తలుచుకుని కాలము గడపవలెను . "అని తనలో తానూ అనుకొనెను . 

రామాయణము సుందరకాండ ఇరువదియైదవసర్గ సమాప్తము . 

                   శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువదినాల్గవసర్గ

                                    రామాయణము 

                                 సుందరకాండ -ఇరువదినాల్గవసర్గ 

వికృతాకారులైన ఆ రాక్షస స్త్రీలు సీతాదేవికి ఇంకా దగ్గరగా జరిగి వారి భయంకరమైన మాటలతో ,చేష్టలతో సీతాదేవిని బయపెట్టసాగిరి . "ఓ సీతా !అత్యత్భుతమైన రావణుని అంతఃపురంలో హాయిగా ఉండక ఎందుకు నీకీ బాధలు ?మానవకాంతవైన నీవు మనిషికి భార్యగా ఉండుటయే గొప్పగా భావిస్తున్నావు . నీవు ఎప్పటికీ ,ఏవిధముగాను రాముడిని చేరలేవు . రాక్షసేంద్రుడైన రావణుడు ముల్లోకములలోని సర్వ సంపదలకు అధికారి . ఆయనకు భార్యవై హాయిగా ఉండుము . "అని పలికెను . 

అప్పుడు సీత "మీకు నచ్చినట్టు నన్ను చంపి తినేయండి . అంతేకాని మీరు చెప్పినట్టు నేను చేయనే చేయను . రాజ్యభ్రష్టుడైన ,మానవుడైనా నాభర్తే నాకు దైవము . ఏదేమైనను నేను నా భర్తను తప్ప మరొకరిని ఆలోచనకి కూడా రానివ్వను "అని పలికెను . 

అశోకవృక్షముపై కూర్చుని మౌనముగా వున్న  హనుమ ఇదంతా చూడసాగెను . అప్పుడా ఆ రాక్షస స్త్రీలు మిక్కిలి కోపముతో సీతాదేవికి మిక్కిలి దగ్గరగా వచ్చి నాలుకలు బయటకు పెట్టి ,పెదవులు చప్పరిస్తూ సీతాదేవిని బయపెట్టసాగిరి . వారు గండ్రగొడ్డళ్లను చేతబూని "రావణుడిని భర్తగా పొందుటకు ఈమె తగదు "అని పలికిరి . అప్పుడు సీతాదేవి కన్నీటిని తుడుచుకుంటూ అశోకవృక్షము మూలకు జరిగెను . రాక్షస స్త్రీలు కూడా సీతాదేవికి దగ్గరగా జరిగిరి . 

భయంకర ఆలంకారము కల వినత అను రాక్షసి "ఓ సీతా !ఇప్పటివరకు నీవు నీ భర్తపై చూపిన ప్రేమ చాలు . ఏ విషయములోనైనా అతిగా ప్రవర్తించినచో అది కష్టములకు దారి తీయును . మానవకాంతా ధర్మము బాగా ఆచరించావు . సంతోషము . ఇక చాలు రాముని త్యజించి దేవేంద్రుడి అంతటి వాడైనరావణుని భర్తగా పొందు . నేను చెప్పిన ఈ మాటలు విననిచో ఇప్పుడే నిన్ను చంపి తినేస్తాము "అని పలికెను . 

పిదప 'వికట 'అను రాక్షసి పిడికిలి బిగించి సీతను భయపెట్టుచూ "ఓ సీతా !నీకు బుద్దిలేదు . కాబట్టే మేమందరము నీ మంచి కోరి చెప్పిన మాటలేవి నీవు వినుట లేదు . నీవు సముద్రమునకు ఇవతలి తీరమునకు తీసుకురాబడినావు . ఇక్కడికి చేరుట కానీ ,నిన్ను కాపాడుట కానీ ఎవ్వరికి తరము కాదు ఏడుపు ఆపి రావణుని భర్తగా పొందు అప్పుడు మేమందరము నీకు దాసీలము . నేను చెప్పిన మాటలు విననిచో నీ గుండెను  చీల్చి గుండెను తింటాను "అని పలికెను . 

అప్పుడు ఛందోదరి అనే రాక్షసి శూలమును తిప్పుతూ "ఈమె యాకృత్తుని (గుండెకు కుడివైపు వుండు మాంసము )ప్లీహము (గుండెకు ఎడమవైపు వుండు మాంసము ),వుత్పీడనము (గుండెకు పైనుండు మాంసము ),గుండె ,ప్రేగులు ,శిరస్సు తినాలని కోరికగా ఉన్నది "అని పలికెను . 

అప్పుడు ప్రఘస అనే రాక్షసి "ఈమె దారికి వచ్చేలా కనిపించుటలేదు . వృధాగా కూర్చోవటం ఎందుకు ?ఈ మూర్ఖురాలి కంఠము నులిపివేసి ,మానవకాంత మరణించిందని రాజుకి నివేదిద్దాము . అప్పుడు ఆయనే 'అయినచో తినేయండి 'అంటారు . ఇందుకు సందేహము లేదు . 

అప్పుడు 'అజాముఖి 'అనే పేరుకల రాక్షసి "మనందరమూ అనవసరముగా తగువు పడవద్దు . ఈమెను ముక్కలుగా కోసి సమానముగా పంచుకుని తిందాము "అని పలికెను . అప్పుడు మిగిలిన రాక్షస స్త్రీలు 'సరే అలాగే చేద్దాము . మద్యము తీసుకురండి . మద్యము త్రాగి నరమాంసము భక్షించి నికుంభిళాదేవి (లంక యొక్క పశ్చిమ ద్వారమందలి భద్రకాళి )తృప్తికై నృత్యములు చేద్దాము . "అని పలికెను . వీరందరి మాటలు విన్న సీతాదేవి ధైర్యము కోల్పోయి ఏడ్చెను . 

రామాయణము సుందరకాండ ఇరువది నాల్గవసర్గ సమాప్తము . 

                  శశి ,

 ఎం .  ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువదిమూడవసర్గ

                                    రామాయణము 

                             సుందరకాండ -ఇరువదిమూడవసర్గ 

రావణుడు రాక్షస స్త్రీలకు సీతాదేవిని ఒప్పించమని ఆజ్ఞ ఇచ్చి అంతఃపురమునకు వెళ్లిపోయెను . పిమ్మట అక్కడ ఉన్న రాక్షస స్త్రీలు బయంకరాకారులై సీతాదేవి వద్దకు వచ్చిరి . 

వారిలో ఏకజట అను పేరుకల రాక్షసి సీతతో "ఓ సీతా !షట్చక్రవర్తులలో నాలుగవవాడైన పులస్త్యుడి వంశంవాడే ఈ రావణుడు . రావణుడు ఎంతో గొప్పవాడు అరివీరభయంకరుడు . అట్టి రావణుని వరించి సంతోషముగా ఉండక నీకు ఈ బాధలెందుకు "అని పలికెను . 

పిల్లి కన్నులు కలిగిన 'హరిజట' అను రాక్షసి "ఓ జానకీ !దేవేంద్రునితో సహా దేవతలందరూ రావణుని చేతిలో ఓడిపోయారు . రావణుడు గర్వింపతగినవాడు ,పరాక్రమము కలవాడు ,మహావీరుడు ,శూరుడు ,రణరంగమున వెన్నుచూపనివాడు ,మహాబలశాలి ,మహా శక్తిసంపన్నుడు ,అట్టివాడికి భార్యవు అవుటకు ఎందుకు అంగీకరించవు ?"అని పలికెను . 

అప్పుడు' ప్రఘస 'అను రాక్షసి "రావణుని భార్యలందరిలో మండోదరి సర్వ సౌభాగ్యవతి . ఆమె అంటే రావణునికి ఎనలేని ప్రేమ గౌరవము , కూడా వీడి రావణుడు నిన్ను పొందకోరుతున్నాడు . బంగారముతో అమూల్యమైన రత్నములతో విలసిల్లే రావణుని అంతః పురములో వేలకొలది స్త్రీలు కలరు . వారందరిని కూడా వీడి రావణుడు నిన్ను కావాలనుకుంటున్నాడు "అని పలికెను . 

తదుపరి 'వికట 'అను పేరుకల రాక్షసి "రావణుడు యుద్దములో దేవతలను ,నాగులను ,గంధర్వులు ,దానవులను అనేకసార్లు ఓడించాడు . అంతటి రావణునికి భార్యవగుటకు నీవు ఎందుకు ఇష్టపడకున్నావు ?"అని పలికెను . 

పిమ్మట' దుర్ముఖి 'అను పేరుకల రాక్షసి "రావణునికి బయపడి సూర్యుడు తీక్షణ కిరణములను ప్రసరింపచేయుటకు భయపడతాడు . వాయువు పెద్దగా వీచడు . చెట్లు ఆయన కోరిక మేరకే పూలు కురిపిస్తాయి . ఓ భామినీ !రావణుడు రాక్షసులకు రాజు అంతేకాదు రాజులకేరాజు అట్టి రావణునిపై ఎందుకు మనసుపడవు ?అతని భార్యవగుట కు ఎందుకు సిద్దపడవు ?నా మాటలు గ్రహింపుము . లేనిచో నీవు బ్రతికి వుండవు . "అని పలికెను . 

రామాయణము సుందరకాండ ఇరువదిమూడవసర్గ సమాప్తము . 

                     శశి ,

 ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువదిరెండవసర్గ

                                రామాయణము 

                          సుందరకాండ -ఇరువదిరెండవసర్గ 

ఆ విధముగా సీతాదేవి మిక్కిలి పరుషముగా పలికిన మాటలు విన్న రావణుడు కోపముతో ఊగిపోతూ ,

"సీతా !ఇప్పుడు నీవు పలికిన పలుకులు కి నిన్ను వెంటనే చంపేయాలి . కానీ నీమీద నాకు వున్న ప్రేమ కారణముగా నీవు ఇటువంటి మాటలు పలికినప్పటికీ ,రాముడిని తలుచుకుంటునప్పటికీ ,ఇంకా బతకానిస్తున్నాను . ఓ జానకీ !నీకు నేను రెండు నెలల గడువు విదించాను . ఆ గడువులోపల నీవు నన్ను అంగీకరించావా సరేసరి లేనిచో గడువు తీరిన మ  నేను రెండు నెలల గడువు విదించాను . ఆ గడువులోపల నీవు నన్ను అంగీకరించావా సరేసరి లేనిచో గడువు తీరి రునాడు ప్రాతః కాలమే (ఉదయమే )నిన్ను ముక్కలుముక్కలుగా చేసి నా వంటవాడు కూరగా వండుతాడు . "అని గర్జించి పలికెను . 

ఈ విధముగా రావణుడు జానకిని బయపెట్టుట చూసిన దేవగంధర్వయక్ష కన్యలు మిక్కిలి బాదపడిరి . ఆ రావణుని మాటలు విన్న సీతాదేవి ఆ దుష్టుడితో

 "ఓ రావణా !ఈ రాజ్యములో నిజముగా నీ మేలుకోరేవాడు ,నీకు మంచి చెప్పేవాడు ఎవ్వడూ లేదనుకుంట . అందుకే నీవు ఇటువంటి దుష్టకృత్యములు చేయుచున్నావు . శ్రీరాముడు ఎదుట పడుటకు జంకి ,ఇప్పుడు ఆయన పరోసఖమున ఇలా కారుకూతలు కూయుటకు నీకు సిగ్గులేదా ?ఓ దశకంఠా !నేనే నిన్నుఇప్పుడే  భస్మము చేయగలను,కానీ రామాజ్ఞ లేనికారణముగా నీవు బతికిపోయావు . నేను కుబేరుని సోదరుడిని ,అపారభాల సంపన్నుడిని అని గొప్పలు పలుకుతున్నావు . అంతటి గొప్పవాడవయితే ,శ్రీరాముని దూరముగా పంపి దొంగవలె నన్ను ఎందుకు అపహరించావు ?నిజముగా నీవు అంత గొప్ప శక్తివంతుడవు అయితే శ్రీరామునికి ఎందుకు ఎదురుపడలేదు ?"అని పలికెను .  

ఆ మాటలు విన్న రావణుడు మిక్కిలి ఉగ్రుడై ,"ఓ సీతా !శ్రీరాముడు బలములేనివాడు ,నీటి తప్పినవాడు వాడిని నేను తలుచుకున్నచో ఇప్పుడే చంపివేయుదును . "

అని పలికి అక్కడే ఉన్న రాక్షస స్త్రీలతో ఎదో విధముగా సీతను దారిలోకి తెమ్మని ఆజ్ఞాపించెను . అప్పుడు ధాన్యమాలీ అను స్త్రీ రావణుని వద్దకు వచ్చి రావణుని అనునయించి తీసుకువెళ్ళేను . 

రామాయణము  సుందరకాండ ఇరువదిరెండవసర్గ సమాప్తము . 

                  శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణం సుందరకాండ-ఇరువదిఒకటవసర్గ

                                             రామాయణం 

                                           

                                               సుందరకాండ-ఇరువదిఒకటవసర్గ 

భయంకరములైన ఆ రాక్షసుని పలుకులు విని ,దీనురాలైన ఆ సీతాదేవి గడ్డిపరకనే బ్రహ్మాస్త్రముగా చేసి ,కాకాసురుడిని చంపిన తన భర్త శ్రీరాముని మనసులో తలచుకుని ,గడ్డిపరకను తనకు ,రావణునికి అడ్డుగా పెట్టుకుని  దీనస్వరంతో నెమ్మిదిగా ఇలా సమాధానమిచ్చెను . 

"నీ మనసుని నా మీద నుండి మరల్చుకుని నీ భార్యలమీదికి మరల్చుకో . ఉత్తమవంశములో పుట్టినదానిని ,దశరధుని పెద్దకోడలిని ,అమిత పరాక్రమవంతుడైన శ్రీరాముని ధర్మపత్నిని ,పతివ్రతని ఐన నేను ఎట్టి పరిస్థితిలో నా భారతను మరచి వేరొకరిని మనసులో తలుచుట కూడా జరగదు . దనము ఆశ చూపినా ,ఎటువంటి ప్రలోభములు పెట్టవలెనని చూసినా ఏ మాత్రము ప్రయోజనము ఉండదు . నీ సమయము వృధా అవుతుంది . కావున నీ మనసు మార్చుకుని రాజ్యభోగములు అనుభవిస్తూ ,నీ భార్యలతో సంతోషముగా వుండు . నన్ను ఆ శ్రీరామునికి అప్పగించు . అదే నీకు ,నీ రాజ్యమునకు ,నిన్ను నమ్ముకున్న వారికి మంచిది . శ్రీరాముడు శరణాగత వత్సలుడు . శరణు వేడినవాడు బద్ధశత్రువైనా పరమదయాలుడు ఐన శ్రీరాముడు నిన్ను తప్పక క్షమించెదరు . 

ధర్మము తప్పి ప్రవర్తించువాడు . ఎంతటి బలవంతుడు అయినను ,ఎంతటి అధికారము ఉన్నను ,ఎంతటి సంపద ఉన్నను ,ఎంతటి బలగము ఉన్నను ,తుదకు అవన్నియు నాశనము అయితీరుతాయి ఇది నిజము . ఇంద్రుడి వజ్రాయుధము నుండి తప్పించుకోగలవేమో కానీ శ్రీరాముని వాడి అయిన బాణములంనుండి తప్పించుకొనుట నీకు అసాధ్యము . భూమ్యాకాశములను దద్దరింపచేసే భయంకరమైన శ్రీరాముని ధనుష్టంకారమును అతి తొందరలోనే నీవు వింటావు . ఓ రావణా !నా భర్త ఐన శ్రీరాముడు దండకారణ్యములో ఒక్కరే నిలిచి నీ సైన్యము ఐన ఖరదూషణులను ,పదునాలుగువేలమంది సైన్యముని మట్టికరిపించారు . ఆయనను ఎదుర్కొను సామర్ధ్యము లేక నన్ను దొంగతనముగా  అపహరించినావు . నీకు ఆయువు మూడినది . కైలాసగిరి పరుగులు తీసినను ,కుబేరుని అలకాపురికి చేరినను ,వరుణ దేవుని సభను ఆశ్రయించినను శ్రీరాముని నుండి నీవు తప్పించుకోలేవు . ఇది తధ్యము . "అని పలికెను . 

రామాయణము సుందరకాండ ఇరువదిఒకటవసర్గ సమాప్తము . 

                  శశి ,

ఎం . ఏ ,ఎం . ఏ (తెలుగు ),తెలుగు పండితులు .