రామాయణము సుందరకాండ -ముప్పదినాల్గవసర్గ

                                 రామాయణము 

                                 సుందరకాండ -ముప్పదినాల్గవసర్గ 

 సీతాదేవి మాటలు విని హనుమ ఆమెను ఓదార్చుచు "అమ్మా !నేను రాముని దూతను ,రామలక్ష్మణులు ఇద్దరూ క్షేమముగా ఉన్నారు . శ్రీరాముడు మీ కుశలము అడగమన్నారు . లక్ష్మణుడు మీకు శిరసు వంచి నమస్కారము చేశానని చెప్పినాడు . "అని పలికెను . రామలక్ష్మణుల గురించి వినగానే ,సీతాదేవి మనసు కొంచం తేలికపడినట్టు అయ్యెను . ఆమె ముఖము వికసించెను . అది చూసి ,దూరముగా ఉన్న హనుమ కొంచం దగ్గరగా వచ్చెను . ఆలా హనుమ దగ్గరకు రావటం చూసిన సీతాదేవి హనుమను రావణుడేమో అని భయపడెను . 

"సాధారణుడైన వానరుడు సముద్రమును దాటి వచ్చుట అసాధ్యమైన పని . కనుక ఇతడు తప్పకుండా రావణుడే అయి ఉంటాడు . పూర్వము ఆశ్రమమునకు సాదు వేషములో వచ్చి నన్ను అపహరించాడు . ఇప్పుడు ఈ వేషములో వచ్చి నా మనసు మార్చాలని ప్రయత్నించుచున్నాడు కాబోలు "అని సీతాదేవి తనలోతాను అనుకొనెను . అప్పుడా సాధ్వి మారుతి తో "వానర రూపమున వున్న నీవు రావణునివే . నీవు ఎంతగా ప్రయత్నించినా ఫలితము ఉండదు . "అని పలికెను . 

ఆ మాటలు విన్న హనుమ "తల్లీ !నీ భయములో అర్ధము వున్నది . కానీ నేను వాయుసుతుడైన హనుమను . నా తండ్రి అనుగ్రహము వలన నాకు దేవతల వలన వచ్చిన శక్తి సామర్ధ్యముల వలన నేను సముద్రలంఘనము చేసి వచ్చినాను . శ్రీ రామునికి మిత్రుడైన సుగ్రీవునికి నేను మంత్రిని . శ్రీరాముని ఆజ్ఞ ప్రకారము నిన్ను వెతుకుతూ ఇచటికి వచ్చినాను . అంతేకాదు త్వరలోనే శ్రీరాముడు సుగ్రీవుడు పెక్కు మంది వానరభల్లూక సైన్యముతో ఇచటికి వచ్చును . ఇది నిజము . "అని పలికెను . 

రామాయణము సుందరకాండ ముప్పది నాల్గవసర్గ సమాప్తము . 

            శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ముప్పదిమూడవసర్గ

                                         రామాయణము 

                                          సుందరకాండ -ముప్పదిమూడవసర్గ 

సీతాదేవి తనను చూసిన పిమ్మట హనుమ నెమ్మిదిగా ఆ అశోకవృక్షము దిగి సీతాదేవికి ఎదురుగా వచ్చి నిలబడెను . ఆ సమయములో రాత్రంతా కాపలా కాసిన రాక్షస స్త్రీలు అల్సటచే ఎక్కడివారక్కడ నిద్రపోయిరి . అప్పుడు హనుమ సీతాదేవితో "అమ్మా !ఓ దివ్య మంగళ రూపినీ !నీవు ఎవరు ?నువ్వు చూచుటకు రాజవంశపు స్త్రీ వలె ఉన్నావు . నేను శ్రీరాముని ధర్మపత్ని ఐన సీతాదేవిని వెతుకుతూ ఇచటికి వచ్చాను . మా దైవము రామచంద్రుడు చెప్పిన పోలికలు నీలో కనిపించుచున్నవి . నీకు భద్రమగుగాక . తల్లీ !దయచేసి మీరెవరో చెప్పండి "అని పలికెను . 

ఆ మాటలు విన్న సీతాదేవి "ఓ వానరా !నేను జనకుని కుమార్తెను ,దశరధుని పెద్దకోడలిని ,నన్ను సీత అంటారు . మా వివాహమైన పిదప అయోధ్యలో సంతోషముగా 12 సంవత్సరాలు వున్నాను 13 వ సంవత్సరము మా మామగారు దశరథ మహారాజు నా భర్త శ్రీరామునికి యువరాజుగా పట్టాభిషేకము చేయుటకు యత్నించెను . కానీ మా మహారాజు చిన్న భార్య కైకేయికి ఇచ్చిన వరముల కారణముగా నా భర్త వనవాసము చేయుటకు వనములకు వెళ్ళుటకు సిద్దపడెను . నేనునూ ఆయనతో వనములకు పయనమయ్యాను . ఆయన సోదరుడు లక్ష్మణుడు కూడా మాతో వనములకు వచ్చాడు . మేము దండకారణ్యములో వున్న సమయములో రావణుడు నన్నుఅపహరించాడు 

 . ఆ దుష్టుడు నాకు రెండు నెలల గడువును విధించాడు . ఆ గడువు పూర్తయిన పిదప నేను ప్రాణములతో  ఉండను .  "అని పలికెను . 

రామాయణము సుందరకాండ ముప్పదిమూడవసర్గ సమాప్తము . 

                     శశి ,

ఎం .ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ముప్పదిరెండవసర్గ

                                   రామాయణము 

                                 సుందరకాండ -ముప్పదిరెండవసర్గ 

శ్రీరాముని కథాగానము విని అశోకవృక్షముపై కూర్చుని వున్న హనుమను చూసి సీతాదేవి ఒక్క నిమిషము స్పృహ కోల్పోయెను . స్పృహలోకి వచ్చిన వెంటనే తాను చూసినది ,విన్నది కల అని బ్రమించెను . "కలలోకి వానరం వచ్చుట అనర్థదాయకం అని పెద్దలు అంటారు . ఈ కల యొక్క చెడు ప్రభావము  ,రామలక్ష్మణుల మీద ,నా తండ్రి జనక మహారాజు మీద,కౌసల్య సుమిత్రా మాతల మీద లేకుండెను కాక . "అని ఆలోచించెను . పిమ్మట "లేదు లేదు నేను ఆ వానరుడిని కళ్లారా చూసాను . అతడు శ్రీరాముడి కథాగానము చేసాడు . ఇది నిజాము అవ్వాలి . "అని దేవతలందరినీ తలుచుకొని ప్రార్ధించెను . 

రామాయణము సుందరకాండ ముప్పదిరెండవసర్గ సమాప్తము . 

              శశి ,

ఎం . ఏ ,ఎం . ఏ (తెలుగు ),తెలుగుపండితులు . 

రామాయణము సుందరకాండ -ముప్పదియొకటవసర్గ

                                          రామాయణము 

                                        సుందరకాండ -ముప్పదియొకటవసర్గ 

శ్రీరాముని దూత ఐన హనుమంతుడు సీతాదేవికి ఒక్కదానికి మాత్రమే వినపడేలా   "ఇక్ష్వాకు వంశములో పరమధార్మికుడు సత్యసంధనుడు శ్రేష్ఠుడు ఐన దశరథ మహారాజు కలడు . అతడికి నలుగురు సంతానము .

 వారిలో పెద్దకుమారుడు  సకలసద్గుణసంపన్నుడు ,ఆయన తండ్రి ఆజ్ఞ ప్రకారము తన భార్యతో సోదరునితో కలిసి వనములకు వెళ్లెను .

 అక్కడ అనేకులైన రాక్షసులను వధించెను . తనవారిని చంపుటచే కోపించిన రాక్షస రాజు రావణుడు మాయలేడి వేషము ధరించిన మారీచుడి సాయముతో కపటోపాయము పన్ని జనక నందని ని అపహరించెను . శ్రీరాముడు భార్యను వెతుకుతూ వానర ప్రభువైన సుగ్రీవునితో స్నేహము చేసెను . 

దుర్మార్గుడైన సుగ్రీవుని అన్న వాలిని చంపి సుగ్రీవునికి పట్టము కట్టెను . సుగ్రీవుడు ప్రత్యుపకారముగా శ్రీరాముని భార్యను వెతుకుటకు వేలకోట్ల మంది వానరులను నలుదిశలకూ వెతుకుటకు పంపెను . దక్షిణ దిక్కుకు యువరాజైన అంగదుడితో ఇంకా కొంతమంది వానర వీరులతో కలిసి నేను సీతామాతను వెతుకుటకు వచ్చినాను . జటాయువు అన్న సంపాతి చెప్పినదాని ప్రకారము . ఆ మహాసాధ్వి ఈ లంకలో ఉండివుండవచ్చునని వంద యోజనములు దూరము కలిగిన మహా సముద్రమును లంఘించి ఈ లంకకు వచ్చినాను .

 శ్రీరాముడు చెప్పిన సీతాదేవి ఆనవాలు ని బాగుగా గుర్తుంచుకుని ఈ లంకా నగరమంతా వెతికినాను . చివరికి ఈ అశోకవనంలో శ్రీరాముడు చెప్పిన లక్షణములు కల పతివ్రతా శిరోమణిని చూసాను "అని పలికెను . 

ఈ మాటలు అన్ని విన్న సీతాదేవి పరమ ఆశ్చర్యముతో సంతోషముతో ఈ మాటలు ఎక్కడినుండి వినపడుతున్నాయా ?అని నలుదిక్కులా చూసి చివరకు అశోకవృక్షముపై కూర్చుని వున్న హనుమను చూసేను . 

రామాయణము సుందరకాండ ముప్పదియొకటవసర్గ సమాప్తము . 

          శశి ,

ఎం . ఏ ,ఎం . ఏ (తెలుగు ),తెలుగుపండితులు . 

రామాయణము సుందరకాండ -ముప్పదియవసర్గ

                                 రామాయణము 

                                      సుందరకాండ -ముప్పదియవసర్గ 

అశోకవృక్షముపై కూర్చుని ఉన్న మారుతి రావణుని పలుకులు ,రాక్షస స్త్రీలు సీతాదేవిని భయపెట్టుట ,త్రిజట స్వప్నవృత్తాంతము ,పిదప సీతాదేవి వ్యాకులపడుతూ తనలో తానూ పలికిన మాటలు వీటన్నిటిని విని అక్కడి పరిస్థితులను అర్ధము చేసుకొనెను . పిదప తనలోతాను "తీవ్రమైన వత్తిడిధాటికి  ఈమె మనసు వ్యాకులమై వున్నది . ఇటువంటి పరిస్థితులలో నేను ఈమెను ఓదార్చకుండా వెళ్ళిపోయినచో రాజపుత్రిక అయిన సీతాదేవి ఎటువంటి రక్షణ ఉపాయము తెలియక తన ప్రాణములు తప్పక తీసుకొనును . కావున నేను ఈమెతో మాట్లాడి వెళ్లవలెను . 

ఒకవేల నేను మాట్లాడకుండా వెళ్ళినట్లయితే నన్ను చూసిన వెంటనే శ్రీరామప్రభువు "జానకి నా గురించి అడిగినదా ?అని ప్రశ్నించిన నేను ఏ సమాధానము చెప్పగలను ?నేను మాట్లాడకుండా వెలికిపోతే ,ఈ మహాసాధ్వి ఈ రక్కసి మూకలమధ్య నిలువలేక ఆత్మత్యాగము చేసుకున్నచో సుగ్రీవుడు శ్రీరామునితో కలిసి యుద్ధమునకు ఇచటికి వచ్చినా ప్రయోజనము వుండదుకదా !నేను ఇక్కడే ఉండి ఈ రాక్షస స్త్రీలు నిద్రించినప్పుడు కానీ ,ఏమరపాటుగా వున్నప్పుడు కానీ సీతాదేవితో మాట్లాడవలెను . కానీ ఈమెతో నేను ఎలా సంభాషించను ?సంస్కృతములో మాట్లాడితే రావణుడు మాయా వేషమున వచ్చినాడని జనకానందని భీతిల్లు ప్రమాదం ఉన్నది . 

ఇప్పుడు నేను వానర రూపమున వున్నాను . ఈ రూపమున ఉన్న నేను మనుష్య భాషలో మాట్లాడితే ఇదంతా రావణుడి మాయగా ఈ సాధ్వి అనుకోవచ్చును . అలా భావించినచో ఈమె బిగ్గరగా కేకలు వేయును . అలా కేకలు వేస్తె ఇక్కడ కాపలా కాయుచున్న రాక్షసులంతా చుట్టుముట్టి నన్ను భందించడమో ,లేక చంపడమొ చేస్తారు . చావు గురించి నాకు భయము లేదు కానీ ,సీతామహాసాధ్వి ఇక్కడే ఉన్నదని నేను మరణించినచో రామునికి ఎలా తెలియును  ?కావున నా ప్రాణములు నిలుపుకొనుట ,ఇక్కడి నుండి బయట పడుట  ఉత్తమము . అంతకు ముందు ఎలాగయినా ఈ మాతతో మాట్లాడవలెను . కానీ ఎలా మాట్లాడాలి ?ఈమె నన్ను విశ్వసించుట ఎట్లు ?"అని తనలోతాను ఆలోచించుకుని ఒక కృత నిశ్చయమునకు వచ్చెను . 

"శ్రీముడు నాకు ప్రభువు . ఆయన సర్వశ్రేష్ఠుడు . ఆయన కదా గానము చేసి సీతామాతకు విశ్వాసము కలిగిన పిమ్మట ఈమె ఎదురుగా వెళ్లి మాట్లాడుట ఉత్తమము "అని  తలఁచెను . 

రామాయణము సుందరకాండ ముప్పదియవసర్గ సమాప్తము . 

                 శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువదితొమ్మిదవసర్గ

                                   రామాయణము 

                            సుందరకాండ -ఇరువదితొమ్మిదవసర్గ 

ఆ విధముగా ప్రాణత్యాగము కొఱకు అశోకవృక్షము వద్దకు వెళ్లిన సీతాదేవికి శుభ శకునములు కనిపించసాగినవి (ఎడమకన్ను అదురుట ,ఎడమ భుజము అదురుట మొదలయినవి ). విజ్ఞానవంతురాలు ఐన సీతాదేవి ,తనకు కలిగే శుభ శకునములు గమనించుకుని ప్రాణత్యాగం ఆలోచనను విరమించి ఇలా ఆలోచించసాగెను . "నాకు శుభశకునములు కలుగుతున్నాయి . వీటిని బట్టీ చూస్తుంటే త్వరలో నాకు మంచి జరుగుతుందని అర్ధమవుతోంది . బహుశా నా ప్రాణనాధుడు నా కొరకు వేటుకు ప్రయత్నమూ చేయుచున్నాడేమో ?లేక ఇటుగా నన్ను వెతుకుతూ వచ్చుచున్నాడేమో ?"అని ఆలోచించుతూ ఆ మహా సాధ్వి మనసు కొంత శోకము నుండి ఉపశమనము పొంది సంతోషము పొందెను . 

రామాయణము సుందరకాండ ఇరువదితొమ్మిదవసర్గ సమాప్తము . 

                          శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము సుందరకాండ -ఇరువదియెనిమిదవసర్గ

                                         రామాయణము 

                                          సుందరకాండ -ఇరువదియెనిమిదవసర్గ 

త్రిజట తన కల గురించి చెప్పినను ,సీతాదేవి ధైర్యము రాకుండెను . సీతాదేవి తన దీన స్థితిని తలచుకుని మిక్కిలి చింతించెను . అదీకాక రావణుని మాటలను ,రక్కసి మూకల బెదిరింపులను పదే పదే జ్ఞప్తికి తెచ్చుకుని చింతించసాగెను . శ్రీరాముడు ఇంకా తనను కాపాడుటకు రాలేదని బాధపడెను . వస్తాడోరాడో అని సందేహపడెను . రక్కసి మూకల బెదిరింపుల మధ్య ప్రతి రోజూ చస్తూ బతకడం కన్నా ,ఒకేసారి చనిపోవుట ఉత్తమమని భావించెను . విషము త్రాగి కానీ ,ఆయుధముతో పొడుచుకుని కానీ చనిపోవాలని అనుకొనెను . కానీ ఈ లంకలో ఎవరు తనకు విషము కానీ ఆయుధము కానీ తెచ్చి ఇవ్వరని అనుకొనెను . చివరికి తన జుట్టుతో చెట్టుకి ఉరిపోసుకుని చనిపోవాలని నిర్ణయానికి వచ్చెను . సీతాదేవి కూర్చున్న చోటు నుండి లేచి బాగుగా పుష్పించిన అశోక వృక్షము వద్దకు చనిపోవుటకు వెళ్లెను . 

రామాయణము సుందరకాండ ఇరువదియెనిమిదవసర్గ సమాప్తము . 

                     శశి ,

ఎం . ఏ ,ఎం . ఏ (తెలుగు ),తెలుగు పండితులు .