రామాయణము యుద్ధకాండ -ఎనుబదినాలుగవసర్గ

                                 రామాయణము 

                                యుద్ధకాండ -ఎనుబదినాలుగవసర్గ 

శ్రీరాముని లక్ష్మణుడు ఓదార్చుచుండగా విభీషణుడు అప్పుడే అక్కడికి వచ్చెను . అక్కడ వున్న వారందరి ముఖములు దీనంగా ఉండుట చూసిన విభీషణుడు విషయము తెలుసుకుని శ్రీరాముడితో "రామా !మా అన్న ఐన రావణుడి ఆంతర్యము నాకు తెలుసు అతడు సీతాదేవిని వధించడు . వానర వీరుల ఉత్సాహము నీరుకార్చుటకై తద్వారా యుద్ధమును గెలుచుటకై మాయావి ఐన ఇంద్రజిత్తు పన్నిన పన్నాగము ఇది . అతడు యుద్ధరంగమున హతమార్చింది నిజముగా సీతామాతను కాదు . మాయా సీతను మాత్రమే . మనలందరిని శోకములో ముంచి యుద్ధము గెలుచుటకై నికుంబలా యాగము చేయుటకు వెళ్ళినాడు . అతడు ఆ యాగము పూర్తి చేసినచో అతడిని గెలుచుట ఇంద్రాదులకు కూడా సాధ్యము కాదు కావున మనము ఇప్పుడే బయలుదేరి ఆ యాగము జరుగు ప్రదేశమునకు వెళ్లి ,ఆ యాగమునకు ఆటంకము కలిగించాలి . లక్ష్మణుని మాతో పంపు అతడి నిశిత శరములకు ఆ ఇంద్రజిత్తు యమలోక గతుడు అవుట తధ్యము "అని పలికేను . 

రామాయణము యుద్ధకాండ ఎనుబదినాలుగవసర్గ సమాప్తము . 

                      శశి ,

ఎం . ఏ ,ఎం . ఏ (తెలుగు ),తెలుగు పండితులు . 

                         

రామాయణము యుద్ధకాండ -ఎనుబదిమూడవసర్గ

                                 రామాయణము 

                                       యుద్ధకాండ -ఎనుబదిమూడవసర్గ 

రాక్షసులు ,వానరులు చేసిన యుద్దకోలాహలము విన్న శ్రీరాముడు తన పక్కనే వున్న జాంబవంతుని వానరులకు సహాయముగా పంపెను . శ్రీరాముడి ఆజ్ఞ ప్రకారము జాంబవంతుడు సేనతో యుద్ధము జరుగుతున్న ప్రదేశమునకు బయలుదేరెను . వారికి దారిలోనే వానరసేనతో పాటుగా హనుమంతుడు కనిపించెను . హనుమంతుడు జాంబవంతుని ఆపి తనతోపాటుగా శ్రీరాముడి వద్దకు తీసుకువచ్చెను . అప్పుడు హనుమ శ్రీరాముడితో దీనస్వరంతో "ప్రభూ !పరమదుర్మార్గుడైన రావణసుతుడు శోకించుచున్న జానకీ మాతను నేను చూస్తుండగానే యుద్ధరంగములో వధించినాడు "అని పలికెను 

ఆ మాటలు వినగానే శ్రీరాముడు మొదలు నరికిన మహా వృక్షము వలె నేలపై కూలిపోయెను . అప్పుడు వానరులందరూ కంగారుతో శ్రీరాముని చుట్టుముట్టిరి . నీరు తీసుకువచ్చి శ్రీరామునిపై  చిలకిరించిరి .స్పృహ లోకి వచ్చిన శ్రీరాముడు సోకసముద్రములో మునిగి కన్నీరుమున్నీరు అయ్యెను . ఆ సమయములో వానరులందరూ శోకముతో గొంతులు పూడిపోయి బొమ్మలులా నిలబడి ఉండిరి . అప్పుడు శ్రీరాముడి తమ్ముడైన లక్ష్మణుడు తానూ ధైర్యము తెచ్చుకుని ,శ్రీరాముని ఓదార్చెను 

రామాయణము యుద్ధకాండ ఎనుబదిమూడవసర్గ సమాప్తము . 

                                        శశి ,

ఎం . ఏ ,ఎం . ఏ (తెలుగు ),తెలుగు పండితులు . 

 

రామాయణము యుద్ధకాండ -ఎనుబదిరెండవసర్గ

                               రామాయణము 

                                యుద్ధకాండ -ఎనుబదిరెండవసర్గ 

ఆ విధముగా యుద్ధరంగమున వెనుతిరిగి పారిపోవుచున్న వానరవీరులను చూసిన హనుమ వారిని ఆఫై వారికి ఉత్సాహము కలిగించి యుద్ధరంగమునకు వచ్చెను . ఇంద్రజిత్తుపై విపరీతమైన కోపముతో వున్న వానరవీరులందరూ తమ యావత్ శక్తితో కసి తీరా యుద్ధము చేయసాగిరి . ఆ విధముగా కసితో యుద్ధము చేయుచున్న వానరుల దాటికి రాక్షసులు తట్టుకొనలేకపోయిరి . చాలా మంది రాక్షసులు మరణించిరి . 

పిదప వానరవీరులందరితో కలిసి ,హనుమ శ్రీరామునికి జానకీ దేవిని ఇంద్రజిత్తు హతమార్చిన విషయము తెలుపుటకై శ్రీరాముడు వున్నా చోటికి బయలుదేరివెళ్లెను . వారు శ్రీరాముడి దగ్గరకు వెళ్ళుట చూసిన ఇంద్రజిత్తు నికుంబలా యాగము చేయదలచి లంకలోకి వెళ్లిపోయెను . నీకుంబలా  యాగమునకు కావలసిన ఏర్పాట్లు చేయించి విధివిధానంగా యాగము చేయనారంభించెను . 

రామాయణము యుద్ధకాండ ఎనుబదిరెండవసర్గ సమాప్తము . 

             శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము యుద్ధకాండ - ఎనుబదియొకటవసర్గ

                                రామాయణము 

                             యుద్ధకాండ - ఎనుబదియొకటవసర్గ 

శ్రీరాముని మనోబలమును చూసిన ఇంద్రజిత్తు మయా యుద్దమువలన శ్రీరాముని జయించలేనని గ్రహించి ,కపటోపాయము ద్వారా శ్రీరాముని మనోబలమును దెబ్బతీసి తద్వారా యుద్ధమును గెలవలెననే ఆలోచనతో యుద్ధరంగమునుండి లంకా నగరంలోకి ప్రవేశించెను . తన రాక్షస మాయతో అచ్చముగా సీతాదేవిలా వుండే ఒక స్త్రీ ని సృష్టించి ,ఆమెను తన రధము పై ఎక్కించుకుని యుద్ధరంగమునకు వచ్చెను . అంతకుముందు వరకు కనపడకుండా మాయా యుద్ధము చేసిన ఇంద్రజిత్తు కళ్లకు కనపడుతుండటంతో వానరులంతా కోపముతో పెద్దగా అరుస్తూ అతడిపై దాడి చేయుటకు రాళ్లను ,చెట్లను ఆయుధములుగా తీసుకుని ఇంద్రజిత్తు వైపుగా పరుగిడి రాసాగిరి . హనుమంతుడు కూడా ఒక పెద్ద పర్వతమును చేతబూని ఇంద్రజిత్తుపైకి యుద్ధమునకు పరుగిడెను . 

అలా ఇంద్రజిత్తును హతమార్చుటకు గట్టిపూనికతో పరుగెడుతున్న హనుమ ఇంద్రజిత్తు రథముపై కల సీతాదేవిని చూసి ,ఆమె సీతాదేవే అని నిర్దారించుకుని అక్కడే నిలబడిపోయెను . మిగిలిన వానరులకు కూడా ఆమె సీతాదేవి అని హనుమ చెప్పెను . అప్పుడు ఇంద్రజిత్తు వానరులందరూ చూచుచుండగా సీతాదేవిని కొట్టసాగెను . ఆమె ఆర్తనాదములు చేయసాగెను . అది చూసిన వానరులంతా బాధతో అదే సమయములో కోపముతో ఊగిపోయిరి . అప్పుడు హనుమ ఇంద్రజిత్తుతో "ఓరి దుష్ట రాక్షసా !నీ రాక్షసత్వము పరాకాష్టకు చేరుకున్నది . నీవు మరణించు సమయము ఆసన్నమయినది అనుకుంటా . అందుకే ఇటువంటి హేయమైన పనికి పూనుకున్నావు . నిజముగా వీరుడైనవాడు స్త్రీని హింసించడు . నీవు చేయుచున్న తప్పునకు ప్రతిఫలంగా నీ ప్రాణములను త్వరలోనే మా చేతిలో వదలబోవుచున్నావు . "అని పలికెను . 

ఆ మాటలు విన్న ఇంద్రజిత్తు హనుమతో "ఓరి పిచ్చి వానరా !మీరందరూ ఈమె కోసమే కదా ఇంత కష్టపడి సముద్రమును దాటిమరీ వచ్చి యుద్ధము చేయుచున్నారు . నేను ఇప్పుడు ఈమెను చంపివేసెదను . అప్పుడు మీ కష్టమంతా వృధా అవుతుంది . ఆ తర్వాత నేను రామలక్ష్మణులను ,సుగ్రీవుడిని కూడా అవలీలగా వధించెదను . అడ్డువచ్చిన వానరులను కూడా నామరూపములు లేకుండా చేసెదను . ఈమెను హింసించుట ద్వారా చంపుట ద్వారా నా శత్రువులైన మీకు బాధ కలుగును . అదే నాకు సంతోషమును కలిగించును "అని పలికి ఇంద్రజిత్తు వానరులందరూ చూస్తూ ఉండగా మాయాసీతను తన ఖడ్గమునకు బలి ఇచ్చెను . పిదప ఇంద్రజిత్తు వానరులతో "వానరులారా !చూడండి . మీ సీతమ్మను . నా ఖడ్గమునకు బలి అయ్యి ,రెండుముక్కలుగా యుద్ధ భూమిలో పడిపోయినది "అని పలికి వికటాట్టహాసము చేసెను . అది చూసిన వానరులు అందరూ భయముతో బాధతో కాళ్ళు వణుకుతూ ఉండగా పెద్దగా రోదనలు చేస్తూ వెనుతిరిగి పరుగిడిరి . 

రామాయణము యుద్ధకాండ ఎనుబదియొకటవసర్గ సమాప్తము . 

                                           శశి ,

ఎం . ఏ ,ఎం . ఏ (తెలుగు ),తెలుగు పండితులు . 

 

రామాయణము యుద్ధకాండ -ఎనబదియవసర్గ

                                  రామాయణము 

                                    యుద్ధకాండ -ఎనబదియవసర్గ 

మకరాక్షుడు యుద్దములో మరణించిన విషయము తెలుసుకున్న రావణుడు తన కుమారుడైన ఇంద్రజిత్తు ని పిలిపించి ,యుద్ధమునకు వెళ్ళమని ఆజ్ఞాపించెను . తండ్రి ఆజ్ఞాపించిన వెంటనే ,అగ్నికి ఆహుతులు సమర్పించి ,అగ్నికి ప్రదక్షణపూర్వకముగా నమస్కారము చేసి ,రధమును అధిరోహించి ,ఇంద్రజిత్తు యుద్ధరంగమునకు బయలుదేరెను . 

యుద్ధరంగమున ఇంద్రజిత్తు ఎవ్వరికిని కనపడకుండా యుద్ధముచేయసాగెను . ఆ సమయములో ఇంద్రజిత్తు  గుర్రపుగిట్టల చప్పుడు కూడా ఎవ్వరికి వినపడకుండా ఉండెను . ఇంద్రజిత్తు ఆకాశములో ఉండి ,వానరులపై ,రామలక్ష్మణులపై బాణములను వర్షములా కురిపించసాగేను . కానీ అతడుకానీ అతడి రథముకాని ఎవ్వరికి కనపడకుండెను .  ఆ బాణముల దాటికి వానరయోధులు పెక్కుమంది మరణించిరి . అనేకమంది గాయములపాలయ్యిరి . రామలక్ష్మణులు బాణములు వచ్చుచున్న దిశవైపుగా బాణములు వేయసాగిరి . ఏ వైపునుండి బాణములు వచ్చుచున్న వారు జాగ్రత్తగా పరిశీలించుచు ,బాణములను మధ్యలోనే త్రుంచివేయసాగిరి . 

అప్పుడు లక్ష్మణుడు శ్రీరాముడితో "అన్నా !ఈ ఇంద్రజిత్తు కపటోపాయముతో ,కనపడకుండా యుద్ధముచేయుచున్నాడు . కనుక ఇతడిని బ్రహ్మాస్త్రము ప్రయోగించి అంతమొందించెదను "అని పలికెను . అప్పుడు శ్రీరాముడు లక్ష్మణుడితో "నాయనా !లక్ష్మణా !యుద్ధరంగములో భయముతో దాగుకొనినవాడిపై  ,పారిపోవువాడిపై , శరణుకోరిన వాడిపై అస్త్రశస్త్ర ప్రయోగము చేయరాదు . ఈ ఇంద్రజిత్తు మనతో ఎదురుగా నిలబడి యుద్ధముచేయు దైర్యములేక ,దాగుకొని యుద్ధముచేయుచున్నాడు . కావున మనము సాధారణ అస్త్రశస్త్రములనే ప్రయోగించి అతడిని ఎదుర్కొందాము . అదియును కాక ఈ ఒక్క రాక్షసుడు చేసిన తప్పిదమునకు యావత్ రాక్షసులందరిని వధించుట సరియైనది కాదు (బ్రహ్మాస్త్ర ప్రభావమున అది ప్రయోగించబడిన చోట ఉన్నవారందరూ మరణించెదరు " "అని పలికెను 

రామాయణము యుద్ధకాండ ఎనబదియవసర్గ సమాప్తము . 

                   శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము యుద్ధకాండ -డెబ్బదితొమ్మిదవసర్గ

                             రామాయణము 

                                  యుద్ధకాండ -డెబ్బదితొమ్మిదవసర్గ 

రావని ఆజ్ఞతో తన సైన్యమును తీసుకుని యుద్ధరంగమునకు వచ్చిన మకరాక్షునికి శ్రీరామునికి మధ్య తీవ్రమైన యుద్ధము జరిగెను . అంతట ఖరుడి కుమారుడైన మఖరాక్షుడు శ్రీరాముని దాటికి నిలవలేక ఆ మాహాబాహు చేతిలో మరణించెను . ఆ సమయములో జయజయ ద్వానములు వానర సైన్యములో మిన్ను ముట్టినవి . 

రామాయణము యుద్ధకాండ డెబ్బదితొమ్మిదవసర్గ సమాప్తము . 

                      శశి ,

ఎం . ఏ ,ఎం . ఏ (తెలుగు ),తెలుగు పండితులు . 

రామాయణము యుద్ధకాండ -డెబ్బదియెనిమిదవసర్గ

                                    రామాయణము 

                                   యుద్ధకాండ -డెబ్బదియెనిమిదవసర్గ 

కుంభ నికుంభులు సమరభూమికి బలి అయ్యారని తెలిసిన రావణుడు ప్రజ్వలించిన అగ్ని వలె అసహనంతో మండిపడెను . వెంటనే అతడు ఖరుని పుత్రుడైన మకరాక్షుని పిలిపించి ,రామలక్ష్మణులను సంహరించిరమ్మని ఆజ్ఞాపించెను . 

రావణుని ఆజ్ఞ ప్రకారము మకరాక్షుడు సైన్యముతో సహా ,యుద్ధమునకు బయలుదేరి వెళ్లెను . 

రామాయణము యుద్ధకాండ డెబ్బదియెనిమిదవసర్గ సమాప్తము . 

                   శశి ,

ఎం . ఏ ,ఎం . ఏ (తెలుగు ),తెలుగు పండితులు .