రామాయణము ఉత్తరకాండ -డెబ్బదియొకటవసర్గ

                      రామాయణము 

                    ఉత్తరకాండ -డెబ్బదియొకటవసర్గ  

12 సంవత్సరములు గడిచినపిమ్మట శత్రుఘ్నుడు స్వల్ప సంఖ్యలో భృత్యులను ,బలములను తీసుకుని అయోధ్యాపురికి పయనమయ్యెను . శత్రుఘ్నుడు దారిలో ఏడెనిమిది చోట్ల విడిది చేసి వాల్మీకి ఆశ్రమమునకు చేరెను .వాల్మీకి మహర్షి ని దర్శించి పాదాభివందనం చేసి ,మునులు చేసిన అతిధి మర్యాదలు స్వీకరించెను. పిమ్మట వాల్మీకి మహర్షి శత్రుఘ్నుడితో "పురుషశ్రేష్టా !పాపాత్ముడైన ఆ రాక్షసుడిని నీవు అవలీలగా వధించావు . అతని మృతితో ఈ లోకముల భయము తొలగిపోయి ప్రశాంతి ఏర్పడెను . నీవు ఆ రక్కసుడితో యుద్ధము చేయుచున్న సమయములో ఇంద్రసభలో ఆసీనుడనయి చూసితిని . నీ పరాక్రమము అమోఘము "అని పలికెను .   ఆ రోజు అక్కడే విశ్రమించెను . 

శత్రుఘ్నుడు అతిధి మర్యాదలు స్వీకరిస్తున్న సమయములోనే ,మరొక కుటీరము నుండి కుశలవులు మధురముగా గానము చేయుచున్న రామగానమును వినెను . ఆ గాథ తన కనుల ముందే జరుగుతున్నట్లుగా అనిపించసాగెను . శత్రుఘ్నుడి వెంట వచ్చిన సైనికులు పరస్పరము ఇలా మాట్లాడుకొనుచుండిరి . "ఇదియేమి ?మనము ఇప్పుడు ఎక్కడఉన్నాము ?ఇది కలకాదు కదా !ఈ పవిత్ర వృత్తాంతము మనకు తెలిసినదే . ఈ గాథ ఈ ఆశ్రమములో మరల యధాతధముగా వింటున్నాము . "అని అనుకుని శత్రుఘ్నుడితో "నరశ్రేష్టా !ఇది ఏమి వింత ?దీనిని గురించి వాల్మీకి మహర్షిని అడిగి తెలుసుకొనండి . "అని పలుకగా ,శత్రుఘ్నుడు "మిత్రులారా !ఈ ముని ఆశ్రమములో ఇలాంటి ఆశ్చర్యములు అనేకము జరుగుతుంటాయి . మనము ఆ విధముగా అడుగుట సముచితము కాదు "అని పలికెను .

రామాయణము ఉత్తరకాండ డెబ్బదియొకటవసర్గ సమాప్తము . 

                                                             శశి ,

                                        ఎం . ఏ ,ఎం . ఏ (తెలుగు ),తెలుగు పండితులు .  

 

రామాయణము ఉత్తరకాండ -డబ్బదియవసర్గ

                   రామాయణము 

                   ఉత్తరకాండ -డబ్బదియవసర్గ  

లవణాసురుడు హతుడైనపిమ్మట ఇంద్రాది దేవతలు అగ్నిదేవుడిని ముందు ఉంచుకుని ,శత్రుసంహార దక్షుడైన శత్రుఘ్నుడితో "నరశ్రేష్టా !ముల్లోకవాసులు చేసుకున్న పుణ్యవశాన నీవు లవణాసురుడిని సంహరించావు . మేము నీకు ఒక వరము ఇవ్వాలని ఇక్కడికి వచ్చాము . వరము కోరుకో "అని పలికిరి . 

వారి మాటలు విన్న శత్రుఘ్నుడు వారికి అంజలి ఘటించి ,"దేవతలారా  !ఈ మధుపురి దేవనిర్మితమైనది . మనోహరమైనది . దీనిని రాజధానిగా చేసుకొని నేను ఇక్కడ నివసించెదను . మీ ఆశీస్సులు నాకు లభించటమే నా పాలిటవరము "అని పలికెను . 

శత్రుఘ్నుడి మాటలు విన్న దేవతలు సంతోషించి "నీవు కోరినట్లే అగుగాక !రమణీయమైన ఈ మదుపురము మహాశూరులతో ,సేనతో సుసంపన్నమగును . ఇది నిశ్చయము . "అని పలికి తమతమ స్థానములకు వెళ్లిరి . శత్రుఘ్నుడు తన సేనను అక్కడికి రప్పించి మదుపురములోకి ప్రవేశించి ,ఆ పురమును పరిపాలించుతూ నివసింపసాగెను . 

శత్రుఘ్నుడి పాలనలో ప్రజలంతా నిర్భయముగా సుఖశాంతులతో హాయిగా ఉండిరి . ఆ ప్రాంతములోని పొలములన్నీ సస్యశ్యామలములయినవి . వర్షములు సకాలములో కురవసాగినవి . ప్రజలందరూ ఆరోగ్యభాగ్యములతో వర్ధిల్లుచుండిరి . ఇల్లు ,కూడళ్లు ,రాజవీధులు ,అంగళ్లు మనోహరముగా ఉండెను . అనేక దేశములనుండి వచ్చిన వర్తకులతో ఆ ఊరి వీధులు కిటకిటలాడుచుండెను . శత్రుఘ్నుడు మధురాపురములో 12 సంవత్సరములు నివసించిన పిమ్మట ఆయనకు శ్రీరాముడిని దర్శించవలెననే కోరిక కలిగినది . 

రామాయణము ఉత్తరకాండ డబ్బదియవసర్గ సమాప్తము . 

                                                                      శశి ,

                                                                                      ఎం .ఏ ,ఎం .ఏ (తెలుగు ),తెలుగు పండితులు . 

రామాయణము , ఉత్తరకాండ ---- అరువది తొమ్మిదవసర్గ

                             రామాయణము 

            ఉత్తరకాండ ---- అరువది తొమ్మిదవసర్గ  

శత్రుఘ్నుడు లవణాసురునితో " నిశాచరా నీవు ఇదివరుకు అనేక మందిని   చంపి ఉండవచ్చు, కానీ ఈ శత్రుఘ్నుడు వారి వంటివాడు కాదు . నేడు నా బాణాగ్నికి గురై నీవు దగ్ధమై పోయి నేలపాలు  కాగా పౌరులు జానపదులు హాయిగా గాలిపీల్చుకొందురు " అని పలుకగా ఆ మాటలు విన్న లవణాసురుడు భగ్గున మండి  పడుతూ ఒక మహా వృక్షమును పెకలించి శత్రుఘ్నుడి పై విసిరెను . శత్రుఘ్నుడు తన బాణముతో దానిని ముక్కలు ముక్కలు చేసెను . పిమ్మట ఆ  రాక్షసుడు అనేక వృక్షములను ఒకదాని వెంట ఒకటి శత్రుఘ్నుడి పై ప్రయోగించెను . ఆ రఘువీరుడు ఏమాత్రం చలించక తన బాణములతో వాటిని అన్నింటిని ఖండించి వేసెను . పిమ్మట లవణాసురుడు ఒక మహావృక్షమును పెకలించి శత్రుఘ్నుడి శిరస్సుపై తీవ్రముగా కొట్టెను .  అతడు ఆ దాటికి మూర్ఛిల్లెను . 

అది చూసిన ఋషులు , దేవ గాంధర్వఅప్సరసలు బిగ్గరగా హాహాకారములు చేసిరి . మూర్ఛితుడై నేలమీద పడిపోయిన శత్రుఘ్నుడు మరణించినట్లుగా ఆ రాక్షుసుడు అపోహ చెందెను . అందుకనే తన శూళమును తెచ్చుకొనుటకు భవనమునకు వెళ్లక అక్కడే కూర్చొని ,తాను వేటాడి  తెచ్చిన ఆహారమును భక్షింప సాగేను . అప్పుడు శత్రుఘ్నుడు స్పృహలోకి వచ్చి ఎప్పటివలె ఆయుధాలు చేబూని నిలబడెను . పిమ్మట శ్రీరాముడు తనకిచ్చిన దివ్యశరమును ప్రయోగించుటకై బయటకు తీసెను . అది ఉత్తమోత్తమమైనది శత్రుభయంకరమైన దానికాంతులు అన్ని దిక్కులకు  వ్యాపించు చుండెను . అది రూపంలో ,శక్తిలో వజ్రాయుధము వంటిది . అది అన్నికణుపుల  యందు వంకరలు కలిగి భయంకరముగా  ఉన్నది . మేరుపర్వతం వలే ధృడమైనది యుద్ధంలో పరాజయం ఎరుగనిది దానీరెక్కలు మనోహరముగా ఉన్నవి.  ఆ బాణ ప్రభావముచే దేవతలతో సహా సమస్త ప్రాణులు మిక్కిలి భయాందోళనలకు లోనయ్యిరి . 

భయాందోళనకు గురైన దేవాసురులు , గంధర్వులు, మునులు ,అప్సరసలు బ్రహ్మదేవుని వద్దకు వెళ్లి " పితామహా! లోకవినాశనం దాపరించిందా? ఇట్టి పరిస్థితి ఇంతకు ముందెప్పుడూ కనీవినీ ఎరుగము.  సమస్త ప్రాణులు కలవర పడుచున్నారు " అని పలుకగా బ్రహ్మదేవుడు " నాయనలారా ! లవణాసురుడుని వధించుటకై శత్రుఘ్నుడు ఒక మహా శరమును చేబూనాడు దాని ప్రభావమే ఇది . అది శ్రీ మహా విష్ణువుకి సంభందించినది . ఆ శరప్రభావము శ్రీ మహా విష్ణువుకి మాత్రమే తెలియును . శ్రీరాముని తమ్ముని చేతిలో లవణాసురుడి సంహారము జరుగును.  ఆ దృశ్యమును మీరు కూడా తిలకింపుడు . " అని పలుకగా దేవతలు అచట నుండి బయలు దేరి యుద్దభూమికి చేరి ఆకాశమునందు నుండి ఆ శరముని చూసేను . ఆకాశములో ఉన్న దేవతలను చూసిన శత్రుఘ్నుడు బిగ్గరగా సింహనాదం చేసి ఆ శరమును ప్రయోగించగా, అది ఆరాక్షసుడి వక్షస్థలమును చీల్చి రసాతలము చేరి మళ్లీ  శత్రుఘ్నుడి తూణీరమునకు చేరెను . 

ఆ లవణాసురుడు మరణించిన వెంటనే పరమ శివుడి మహాశూలము ఆయన వద్దకే చేరెను . అది చూసిన దేవతలు ఋషులు నాగులు అప్సరసలు , అందరు శత్రుఘ్నుడిని పొగడ్తలతో ముంచెత్తిరి . 

రామాయణము ఉత్తరకాండ అరువదితొమ్మిదవసర్గ సమాప్తము . 

                                                                            శశి ,

                                                                                      ఎం . ఏ ,ఎం . ఏ (తెలుగు ),తెలుగు పండితులు . 

రామాయణము , ఉత్తరకాండ ------ ఆరువది ఎనిమిదవసర్గ

                            రామాయణము 

                       ఉత్తరకాండ ------ ఆరువది ఎనిమిదవసర్గ  

మరునాడు ప్రాతఃకాలము లవణాసురుడు మాంసాహార సంపాదనకు నగరం నుండి బయలుదేరెను . ఇంతలో మహావీరుడగు శత్రుఘ్నుడు యమునా నదిని దాటి ధనుర్భాణములను ధరించి మధురాపుర ధ్వారమునందు నిలిచి ఉండెను . ఆ రాక్షసుడు మధ్యాహ్న వేలకు అనేక మృగములను వేటాడి వాటిని తీసుకొని వస్తూ శత్రుఘ్నుడిని చూసి " నరాధమా ! ఈ ధనుర్భాణాలతో నన్నేమి చేయగలవు ? నీలాగే అనేక వేలమంది ఆయుధాలతో నాపై రాగా వారందరిని నేను సునాయాసంగా భక్షించి వేసితిని . ఈ రోజు నాకు కావాల్సిన ఆహారము సంపూర్ణముగా లభించలేదు.  నాకు ఆహారమవ్వటానికి నీవు స్వయంగా వచ్చినావు . " అని పలుకుతూ పదేపదే వికటాట్టహాసము చేయుచున్న రాక్షసుడిని చూసి శత్రుఘ్నుడు " దుర్మతీ ! నేను నీతో ద్వంద్వ యుద్ధం చేయగోరుతున్నాను . నేను దశరధ మహారాజు కుమారుడును . శ్రీ రాముడి సోదరుడని . నా పేరు శత్రుఘ్నుడు.  నిన్ను వధించుటకై ఇక్కడికి వచ్చితిని నీవు సకల ప్రాణులకు శత్రుడవు . నాకంట  పడిన పిమ్మట ఇక ప్రాణములతో తిరిగి పోలేవు . " అని పలికెను . 

ఆ మాటలు విన్న రాక్షసుడు అవహేళనగా నవ్వుతూ " దుర్మతీ! నా అదృష్టం కొద్దీ నీవు నేడు నాచేతికి చిక్కావు . రాక్షస రాజైన రావణుడు నాపినతల్లి ఐన సూర్పనఖకు సోదరుడు స్త్రీకారణంగా అతడు రాముడి చేతిలో హతుడయ్యెను . నీ అన్న అతడినే కాక అతని వంశమును కూడా రూపుమాపేను . ఇప్పుడు నేను నీ అంతం ద్వారా అన్నిటికి సమాధానము చెప్పెదను . క్షణకాలం ఆగుము నా ఆయుధమును తీసుకు వచ్చి ఇప్పుడే నాతో యుద్ధముచేయవలననే నీ కోరికను తీర్చెదను . " అని పలికెను . అప్పుడు శత్రుఘ్నుడు " ఓయీ నాచేతికి చిక్కిన నీవు తిరిగి ప్రాణాలతో ఎక్కడికి పోగలవు? నా బాణాలతో నిన్ను యమపురికి పంపెదను . నీ ఆత్మీయులందరిని ఒక్కసారి స్మరించుకో " అని పలికెను . 

రామాయణము ఉత్తరకాండ అరువదియెనిమిదవసర్గ సమాప్తము . 

                                                                                    శశి ,

                                                                                         ఎం . ఏ ,ఎం . ఏ (తెలుగు ),తెలుగు పండితులు . 

రామాయణము, ఉత్తరకాండ ---- అరువది ఏడవసర్గ .

                            రామాయణము 

                ఉత్తరకాండ ---- అరువది ఏడవసర్గ .  

శత్రుఘ్నుడు యమునానదీ తీరంలో కొంతకాలము విశ్రాంతిగా  గడిపెను . ఒకరోజు శత్రుఘ్నుడు లవణాసురుడి బలము తెలుసుకొనగోరి భృగువంశజుడు అయిన చ్యవనమహర్షితో " బ్రాహ్మణోత్తమా! లవణాసురుడి శూళముయొక్క బలం ఎట్టిది? . ఆ లవణాసురుడు ఇంతకుముందు ఎవరితో యుద్ధంచేసాడు? . అతని చేతులో మరణించిన వారు ఎవరు? " అని పలుకగా చ్యవన మహర్షి " రఘునందనా యుద్ధరంగంలో ఈ శూళముదాటికి అనేక మంది మృతులయ్యిరి పూర్వము ఇక్ష్వాకు వంశపు రాజైన మాంధాత అయోధ్యను పరిపాలించుచుండెను . అతడు మిక్కిలి బలపరాక్రమాలు కలవాడు . ముల్లోకాలలో ఖ్యాతికి ఎక్కినవాడు . భూమండలంలో చాలాభాగము అతని అధికారంలో కలదు . ఇట్లుండగా ఆరాజు దేవలోకమును జయించుటకు పూనుకొనెను . విషయము తెలిసిన  ఇంద్రుడు భయాందోళనకు గురిఅయ్యెను . మాంధాత యుద్దమునకై స్వర్గమునకు వచ్చెను . అప్పుడు ఇంద్రుడు అతనితో" ఓ మహాపురుషా !నీవు మనుష్యలోకమునకు పూర్తిగా రాజువి కాలేదు.  నీవు సమస్త భూతలమును నీ వశంలోకి తెచ్చుకొనిన  పిమ్మట, నీ బలాలతో వాహనాలతో కలిసివచ్చి, స్వర్గమును పరిపాలింపుము " అని పలికెను . 

అప్పుడు మాంధాత " సురపతీ ! భూలోకంలో నా శాసనం చెల్లనిది ఎక్కడ ? " అని ప్రశ్నించెను . అప్పుడు ఇంద్రుడు" పుణ్యాత్ముడా  మదుపుత్రుడైన లవణాసురుడు మధువనమునకు ప్రభువుగా ఉన్నాడు . నీ శాసనం అతడు పాటించడు " అని పలికెను . ఆ మాటలు విన్న మాంధాత సిగ్గుతో తలవంచుకొని మరేమి మాట్లాడక స్వర్గమును వదిలి లవణాసురుడుని జయించుటకై బలములతో మధువనంలో ప్రవేశించెను . పిమ్మట అతడు యుద్ధం చేయగోరి లవణుడి  వద్దకు తన దూతను పంపెను . దూత మాటలు విన్న లవణుడు కోపంతో ఆ దూతను భక్షించి వేసెను . ఎంత సమయం గడిచినా దూత తిరిగి రాకపోవడంతో మాంధాత మిక్కిలి కోపంతో అన్ని వైపుల నుండి శరవర్షం కురిపించెను . అప్పుడా లవణాసురుడు వికృతంగా నవ్వుతూ  తన శూళమును చేతబూని పరివారంతో సహా యుద్ధమునకు దిగెను . 

పిమ్మట ఆ లవణాసురుడు ఆ శూళమును ప్రయోగించగా అది మిరుమిట్లు గొలుపుతూ ఆ మహారాజుని అతని పరివారంతో సహా భస్మం చేసి తిరిగి లవణాసురుడిని చేరెను . శతృఘ్నా! ఆ శూలప్రభావము సాటిలేనిది  . రఘువంశజా! నీవు రేపు ప్రాతఃకాలమునే ఆలవణాసురుడు శూళమును చేబూనకముందే అతడిని వధింప గలవు . ఇది నిశ్చయము . నీవు లవణాసురుడుని వధించుటతో సకల లోకములకు శుభములు చేకూరును . 

రామాయణము ఉత్తరకాండ అరువదియేడవసర్గ సమాప్తము . 

                                                                                                   శశి ,

                                                                                            ఎం . ఏ ,ఎం . ఏ (తెలుగు ),తెలుగు పండితులు . 

రామాయణము ,ఉత్తరకాండ -అరువదిఆరవసర్గ

                            రామాయణము 

                               ఉత్తరకాండ -అరువదిఆరవసర్గ  

శత్రుఘ్నుడు వాల్మీకి ఆశ్రమంలో ఉన్న ఆ రోజు రాత్రే సీతాదేవికి ప్రసవమై ఇద్దరు మగపిల్లలు జన్మించిరి.  ఆ వార్త విన్నవెంటనే వాల్మీకి మహర్షి అక్కడికి వచ్చి ముద్దులొలుకుతూ, బాలసూర్యునివలె విరాజిల్లుతున్న ఆ బాలురులను చూసిరి . పిమ్మట వారికి రాక్షస , భూతపిశాచ బాధలు కలుగకుండా రక్షావిధులని చేసిరి . ఆ ఇద్దరు శిశువులలో ముందు పుట్టిన  వానికి కుశుడు  అని పేరు, రెండవ వానికి లవుడు అని పేరు పెట్టిరి . 

సీతాదేవి కవలలను కనుట ,వారికి వాల్మీకి మహర్షి ఆజ్ఞతో వృద్దవనితలు రక్షాకార్యక్రమాలు నిర్వహించుట, వారికి పేర్లు పెట్టుట, మొదలగు విషయములన్ని, ఆ అర్దరాత్రియందే  విని శత్రుఘ్నుడు చాలా సంతోషించెను . పిమ్మట అయన తనలో తాను సీతామాత సౌభాగ్యంతో వర్ధిల్లు గాక అనుకొనెను . మరునాడు ప్రాతఃకాలమే సంధ్యావందనాది ప్రాతఃకాల క్రియలు ఆచరించి వాల్మీకి మహర్షి ఆశీస్సులు పొంది పశ్చిమ దిశగా ప్రయాణమయ్యెను . ఏడుదినములు ప్రయాణం చేసి యమునా  తీరములో ఉన్న ఋషీశ్వరుల ఆశ్రమమునందు ఆగెను . కాంచనుడు మొదలగు మహర్షులతో పెక్కు కదా ప్రసంగాలతో విశ్రాంతిగా ఆరోజు రాత్రి గడిపెను 

రామాయణము ఉత్తరకాండ -అరువదియైదవసర్గ

                      రామాయణము 

                                ఉత్తరకాండ -అరువదియైదవసర్గ  

శత్రుఘ్నుడు రెండురోజులు ప్రయాణించి వాల్మీకి ఆశ్రమానికి చేరెను . అక్కడ వాల్మీకి మహర్షికి పాదాభివందనం చేసి ,"శ్రీరాముడి ఆదేశానుసారం ఒక ముఖ్యకార్యముపై సాగిపోవుచూ ఇక్కడికి వచ్చితిని . ఈ రాత్రికి ఇక్కడ ఉండి ,రేపు ప్రాతః కాలమునే బయలుదేరి పశ్చిమదిశగా వెళ్లెదను . "అని పలికెను . 

శత్రుఘ్నుని మాటలు విని వాల్మీకి మహర్షి నవ్వుతూ "యశశ్వీ నీకు స్వాగతము "అని పలికి శత్రుఘ్నుడికి అతిథిసత్కారములు చేసెను . 

రామాయణము ఉత్తరకాండ అరువదియైదవసర్గ సమాప్తము . 

                                                                           శశి ,

                                                                                            ఎం . ఏ ,ఎం . ఏ (తెలుగు ),తెలుగు పండితులు .